Խորհրդակցություն Ոստիկանությունում՝ հանրաքվեի նախապատրաստման փուլի վերաբերյալ
Ոստիկանություն տեղի ունեցած օպերատիվ խորհրդակցության ընթացքում այսօր քննարկվել է Սահմանադրության փոփոխությունների հանրաքվեի նախապատրաստման փուլում ոստիկանության գործունեության արդյունքներն ու ծառայության կազմակերպման առանձնահատկությունները:
«Ոստիկանապետ Վլադիմիր Գասպարյանը ներկայացրեց հանրաքվեի օրը ծառայության կազմակերպման գլխավոր ուղղությունները՝ ընտրատարածքների մերձակայքում կուտակումների բացառում, «Ընտրությունների ժամանակ ոստիկանության գործողությունների ուղեցույցի» իմացության ստուգարքների կազմակերպում տարածքային բաժիններում, կենտրոնական ապարատի և ծառայություն կատարող վերակարգերի միջև անընդմեջ կապի ապահովում և այլն: Ոստիկանության պետը հատուկ ուշադրություն դարձրեց սահմանափակ ֆիզիկական կարողություն ունեցող քաղաքացիներին օժանդակելու խնդրին»,- հայտնում է Ոստիկանության կայքէջը։
Ըստ պաշտոնական տեղեկատվության՝ Վլադիմիր Գասպարյանը կարևորել է հանրության, հասարակական կազմակերպությունների, զանգվածային լրատվության միջոցների և առանձին քաղաքացիների հետ տարվող աշխատանքը, հետադարձ կապի ապահովման անհրաժեշտությունը՝ ինչպես հանրաքվեի օրը, այնպես էլ նախորդող շրջանում։
Հիշեցնելով, որ ոստիկանության վերահսկողական ծառայություններըընտրատեղամասերի տարածքում անմիջաբար են հսկելու վերակարգերի աշխատանքը, Վլադիմիր Գասպարյանը մյուս ծառայություններին հրահանգել է ակտիվացնել օպերատիվ ու կանխարգելիչ աշխատանքներըքարոզարշավի և հանրաքվեի ժամանակ պատշաճ հասարակական կարգ ապահովելու, իրավախախտումները բացառելու, օրենքի պահանջները լիարժեք կատարելու համար:
Վլադիմիր Գասպարյանն անդրադարձել է նաև այս օրերին հանրային գոտիներում, տրանսպորտային հանգույցներում, զանգվածային միջոցառումների վայրերում ոստիկանության արտաքին ծառայության ուժեղացմանը՝ պայմանավորված համաշխարհային ու տարածաշրջանային նոր մարտահրավերներով: Ոստիկանության պետը հայտնել է, որ այդ ոլորտում սերտորեն համագործակցելով հանրության հետ, անհրաժեշտ է անվտանգության բարձր մակարդակ ապահովել նաև հանրաքվեի և նախորդող օրերին: