«Չե՛ք անցկացնի»-ն կոչ է անում «համարժեքորեն» արձագանքել ոստիկանության գործողություններին
«Չե՛ք անցկացնի» նախաձեռնությունը դատապարտում է ոստիկանության երեկվա գործողություններն ու կոչ անում «համարժեքորեն» արձագանքել դրանց։
Այսօր տարածած հայտարարությունում նախաձեռնությունը մասնավորապես նշում է. - «Երեկ Ազգային ժողովի մոտ ընդդեմ սահմանադրական փոփոխությունների իրականացված բողոքի ակցիայի ժամանակ ոստիկանությունը ֆիզիկական ուժի գործադրմամբ ապօրինաբար՝ առանց որևէ իրավական հիմքեր ունենալու բերման է ենթարկել ակցիայի մասնակից թվով 21 քաղաքացու, այդ թվում՝ նախաձեռնության անդամների: Ոստիկանության բաժնում առանց որևէ հիմնավորման շուրջ երեք ժամ սահմանափակվել է ինչպես քաղաքացիների ազատ տեղաշարժի սահմանադրական իրավունքը, այնպես էլ՝ Հայաստանի օրենդրության մի շարք դրույթներ»:
«Չե՛ք անցկացնի»-ն նշում է, որ «ապօրինաբար բերման ենթարկված քաղաքացիներին տևական ժամանակ հնարավորություն չի ընձեռվել հանդիպել փաստաբաններին և Մարդու իրավունքների պաշտպանի գրասենյակի արագ արձագանքման խմբի անդամներին»:
Նախաձեռնությունը խստորեն դատապարտում է ոստիկանության կամայականությունները և կոչ անում կուսակցություններին, հասարակական կազմակերպություններին, քաղաքացիական նախաձեռնություններին ու շարժումներին, միջազգային կազմակերպությունների հայաստանյան գրասենյակներին ու դեսպանատներին՝ «աչալրջորեն հետևել իշխանությունների սանձազերծած ապօրինի գործողություններին ու համարժեքորեն արձագանքել դրանց՝ հետագայում նմանատիպ գործելաոճը կանխարգելելու նպատակով»։