Ժիրայր Սեֆիլյան․ Մենք ամբողջությամբ Նիկոլի կողքին ենք լինելու
Սեֆիլյանը հայտարարեց, որ նորաստեղծ «Սասնա ծռեր» կուսակցությունը ևս մասնակցելու է արտահերթ խորհրդարանական ընտրություններին, սակայն թե ինչ ձևաչափով դեռ հստակ չէ։ Ասում է՝ հնարավոր ամեն ինչ անելու են՝ օժանդակելու գործող իշխանությանը, վարչապետ Նիկոլ Փաշինյանին. - «Մենք ժամանակ ենք կորցնում օր առաջ երկիրը զարգացման հունի մեջ դնելու համար: Եվ այդ զարգացման փուլի գլխավոր հանգրվանը դա նոր Ազգային ժողովի ձևավորումն է: Վերջապես 20-25 տարիների ընթացքում առաջին անգամը պիտի լինի, որ ժողովրդի կամքով մեր երկրում ձևավորվելու է քաղաքական դաշտ: Եվ բնականաբար, առանց քաղաքական դաշտի ձևավորման, երկրի զարգացում հնարավոր չէ: Այս իմաստով շատ մեծ նշանակություն ունի շատ շուտ լուծարումը այս Ազգային ժողովի և օր առաջ ձևավորել նոր քաղաքական դաշտ՝ ժողովրդի կարծիքին հարիր»:
Հարցին, թե եթե Ազգային ժողովն ինքնալուծարման չգնա, արդյոք պատրաստ է Նիկոլ Փաշինյանի հետ միասին փողոց դուրս գալ և շարունակել պայքարը, արձագանքը միանշանակ էր. - «Անշուշտ: Մենք Նիկոլի կողքին են լինելու մինչև այն ժամանակ, որ մեր երկրում չի ձևավորվել դասական իմաստով քաղաքական դաշտ: Մենք ամբողջությամբ Նիկոլի կողքին ենք լինելու»:
«Իսկ ձևավորվելուց հետո ժամանակը կհուշի, ապագա Ազգային ժողովի ձևակազմը ինչպիսին կլինի՝ մեր ժողովուրդը կորոշի: Դրանից հետո ամենի մասին կարող ենք խոսել: Վերջապես բոլորս պիտի գիտակցենք, որ զարգացման հուն ասելով, պիտի հասկանանք, որ պետք է տեղի ունենա բազմակարծություն, պետք է տեղի ունենան բանավեճեր, պետք է ծնվի ոսկե միջինը բոլոր ռազմավարական նշանակություն ունեցող ոլորտների հետ կապված: Այսօր այդ հնարավորությունը չունի հայ ժողովուրդը», - հավելեց Ժիրայր Սեֆիլյանը:
Վաղը տեղի կունենա «Սասնա ծռեր» համահայկական կուսակցության հիմնադիր համագումարին, որտեղ կընտրվի կուսակցության ղեկավար կազմը: