«Ռուսները կփորձեն միջամտել Մակեդոնիայի հանրաքվեին». Մաթիս
ԱՄՆ պաշտպանության նախարար Ջիմ Մաթիսը Մակեդոնիայում ասել է, որ Ռուսաստանը կարող է դրամական միջոցների և քաղաքական ազդեցության լծակներով փորձել միջամտել Մակեդոնիայում երկրի անվանման հարցով անցկացվելիք հանրաքվեին:
«Կասկած չկա, որ նրանք [ռուսները] գումարներ են փոխանցել և փորձում են ազդեցություն գործել», - նախազգուշացրել է Մաթիսը մայրաքաղաք Սկոպյեում:
Նրա փոխանցմամբ, դեռ հնարավոր չէ ասել, թե արդյոք ռուսներին կհաջողվի կանխել հանրաքվեի դրական պատասխանը:
Արևմտյան երկրների բարձրաստիճան պաշտոնյաները վերջին շաբաթներին պարբերաբար այցելում են Մակեդոնիա և կոչ են անում դրական պատասխանով լուծել 1991 թվականից ծագած վեճը հարևան Հունաստանի հետ, ինչը Մակեդոնիային կընձեռի ՆԱՏՕ-ին անդամակցելու հնարավորություն:
Մոսկվան կտրականապես դեմ է Մակեդոնիայի անդամակցությանը Հյուսիսատլանտյան դաշինքին:
Հարցումների արդյունքները վկայում են, որ մակեդոնացիների գերիշխող մեծամասնությունը մտադիր է «այո» ասել սեպտեմբերի 30-ին նախատեսված հանրաքվեում, սակայն այն կայացած կհամարվի, եթե քվեարկի ընտրելու իրավունք ունեցող 1 միլիոն 800 հազար քաղաքացիների ավելի քան 50 տոկոսը:
Եթե հանրաքվեն կայանա և դրական արդյունք գրանցի՝ երկիրը կկոչվի «Հյուսիսային Մակեդոնիայի հանրապետություն»:
Երկրի ներկայիս պաշտոնական անվանումն է «Նախկին Հարավսլավիայի Դաշնության Մակեդոնիայի հանրապետություն»:
Հունաստանը դեմ է «Մակեդոնիա» անվանմանը, քանի որ ունի նման անունով տարածք և այդ անվանումը դիտում է որպես տարածքային ոտնձգություն:
Թե՛ Մակեդոնիայում, թե՛ Հունաստանում ազգայնական շրջանակները դեմ են «Հյուսիսային մակեդոնիայի հանրապետություն» անվանմանը: