Կնոջը մեղադրանք է առաջադրվել Պռոշյանում նորածնին ծառի տակ թողնելու համար
Քննչական կոմիտեն հաղորդում է, որ Կոտայքի մարզային քննչական վարչության Նաիրիի քննչական բաժնում քննվող քրեական գործով ձեռնարկված մեծածավալ քննչական գործողությունների արդյունքում բացահայտվել են նորածին երեխային վտանգի մեջ թողնելու դեպքի հանգամանքները, մեղադրանք է առաջադրվել երեխայի մորը:
«2017 թվականի օգոստոսի 12-ին՝ ժամը 09:20-ին, ահազանգ էր ստացվել առ այն, որ Պռոշյան գյուղի Տեղերաշեն փողոցի տներից մեկի հողամասում՝ ծառի տակ, թողնվել է նորածին երեխա: Իգական սեռի երեխային հայտնաբերել է Կոտայքի մարզի Պռոշյան գյուղի բնակիչը՝ իրենց տան բակում գտնվող սալորի ծառի տակ: Դեպքի առթիվ հարուցվել է քրեական գործ՝ ՀՀ քրեական օրենսգրքի 128-րդ հոդվածի 2-րդ մասի հատկանիշներով», - իր հաղորդագրությունում հիշեցնում է Քննչական կոմիտեն:
Քննչական գործողությունների արդյունքում փաստական տվյալներ են ձեռք բերվել երեխայի մոր ինքնության վերաբերյալ, ով, ըստ Քննչական կոմիտեի, Կոտայքի մարզի բնակչուհի է՝ ծնված 1981 թվականին:
«Նախնական քննության տվյալներով` կինը ծննդաբերել է 2017թ. օգոստոսի 12-ին՝ ժամը 04:00-05:00 սահմաններում, տնային պայմաններում, ինչից հետո էլ երեխային թողել է Պռոշյան գյուղի Տեղերաշեն փողոցի տներից մեկի հետնամասում գտնվող այգում», - փոխանցում է Քննչական կոմիտեն:
Ձեռք բերված բավարար ապացույցների համակցությամբ նորածնի մորն այսօր մեղադրանք է առաջադրվել ՔՕ 128-րդ հոդվածի 2-րդ մասով` «կյանքի կամ առողջության համար վտանգավոր վիճակում գտնվող և ինքնապահպանության միջոցներ ձեռնարկելու հնարավորությունից զրկված անձին անօգնական վիճակում թողնելը, եթե հանցավորն այդ անձին օգնություն ցույց տալու իրական հնարավորություն է ունեցել և պարտավոր է եղել նրան խնամելու կամ ինքն է նրան դրել կյանքի համար վտանգավոր վիճակում»: Կինը հարցաքննվել է:
Նախաքննությունը շարունակվում է:
ՔՕ 128-րդ հոդվածի 2-րդ մասով նախատեսված արարքը պատժվում է տուգանքով՝ նվազագույն աշխատավարձի 100-ապատիկից 150-ապատիկի չափով, կամ կալանքով՝ առավելագույնը երկու ամիս ժամկետով: