Մոսկվայում այսօր կբացվի ստալինյան բռնաճնշումների զոհերի հուշակոթողը. Պուտինը կմասնակցի բացմանը
Ռուսաստանում այսօր ստալինյան բռնաճնշումների հիշատակի օրն է։ Մոսկվայում Սախարովի պողոտայի և Սադովայա փողոցների խաչմերուկում բացվելու է բռնաճնշումների զոհերի հուշակոթողը։
Բացման արարողությանը մասնակցելու է Ռուսաստանի նախագահ Վլադիմիր Պուտինն ու Համայն Ռուսիո Կիրիլ Պատրիարքը։
Հուշակոթողի հեղինակն է հայտնի քանդակագործ Գեորգի Ֆրանգուլյանը։
Խորհրդային շրջանի մի շարք հայտնի այլախոհներ, սակայն, հանդես են եկել բաց նամակով՝ նման հուշակոթողի բացումը որակելով ցինիզմ։
«Իշխանությունների երեսպաշտությանն աջակցելը անբարոյականություն է: Չի կարելի մասնակցել մի իշխանության կազմակերպած միջոցառումներին, որն իբր ցավում է խորհրդային վարչակազմի զոհերի համար, բայց իրականում շարունակում է քաղաքական բռնաճնշումները և սահմանափակում է քաղաքացիական ազատությունները երկրում», - նշված է խորհրդային նախկին հանրապետություններ ներկայացնող շուրջ չորս տասնյակ այլախոհների` Kasparov.ru կայքում հրապարակված բաց նամակում:
Ուղերձի հեղինակների թվում է նաև Վարդան Հարությունյանը։ «Պուտինյան Ռուսաստանը նման հուշակոթող բացելու բարոյական իրավունք չունի», - «Ազատության» հետ զրույցում ասել է Հարությունյանը։
Ավելի վաղ ամերիկացի ռեժիսոր Օլիվեր Սթոունի ֆիլմում՝ պատասխանելով Ստալինի մասին հարցին, Պուտինն ասել էր, որ Ստալինը միանշանակ գործիչ չէր։ «Մի կողմից բոլոր այդ բռնաճնշումներն են, որոնց հետևանքով միլիոնավոր մարդիկ են տուժել, մյուս կողմից՝ Ստալինը ագրարային Ռուսաստանը դարձրել է զարգացած արդյունաբերություն ունեցող պետություն», - ասել է Պուտինը։
Երեկ Մոսկվայում քաղաքացիները ընթերցում էին զոհվածների անունները։ Սգո այս արարողությանը մասնակցել են մտավորականներ, եվրոպացի դիվանագետներ, լրագրողներ և քաղաքական գործիչներ, այդ թվում՝ նաև Գրիգորի Յավլինսկին, Քսենիա Սոբչակը։
Սոբչակն անունները ընթերցելուց հետո, մասնավորապես, ասել է. - «Այնպես պետք է անել, որ հատուկ ծառայությունների և ռեպրեսիաների վրա հիմնված իշխանությունը երբեք չկրկնվի»։
2018-ին կայանալիք նախագահական ընտրություններին իր մասնակցության մասին հայտարարծ լրագրող Քսենիա Սոբչակն ավելի վաղ իր բլոգում գրել էր, որ ստալինյան ռեպրեսիաների տարիներին Սովետական Միությունում սպանվել է 2 միլին 249 հազար 728 մարդ։
«Ստալինը Սովետական Միության բոլոր ազգերի թշնամին էր։ Նա մի համակարգ է ստեղծել, որտեղ իշխանությունը պատկանում է հատուկ ծառայություններին, և մինչ օրս այդ համակարգը հնարավոր չի եղել քանդել Ռուսաստանում», - գրել է Սոբչակը։