Նորքի զինված խմբի գործով դատավարությանը շարունակվում է վկաների հարցաքննությունը
Նորքի զինված խմբի գործով դատական նիստին այսօր հարցաքննվեցին երեք վկաներ: Նրանցից երկուսը՝ Հարություն Հովհաննիսյանն ու Ստեփան Չիլինգարյանն այս գործի անջատված մասով՝ զինված խմբի պարագլուխ Արթուր Վարդանյանին զենք վաճառելու մեղադրանքով արդեն կրել են իրենց պատիժն ու ազատ արձակվել: Երկուսն էլ հրաժարվեցին այսօր դատարանում ցուցմունք տալ, հետևաբար մեղադրող դատախազը հրապարակեց նրանց նախաքննական ցուցմունքները:
Հարություն Հովհաննիսյանը մեկ տարվա ազատազրկման էր դատապարտվել: Համաձայն նախաքննական ցուցմունքի, Հովհաննիսյանը զենքի իրացման վերաբերյալ իրեն առաջադրված մեղադրանքը չի ընդունել: Ցուցմունքում նշել է, որ ավտոտնակում հայտնաբերել է հանգուցյալ հոր զենքերը, ու քանի որ վարկեր և ֆինանսական այլ խնդիրներ է ունեցել, վաճառել է դրանք իր համաքաղաքացի, գյումրեցի տաքսու վարորդ Անուշավան Ավետիսյանին, ով այս գործով անցնող մեղադրյալներից է: Ըստ ցուցմունքի, չի հետաքրքրվել Ավետիսյանից, թե նա զենքն ինչ նպատակով է գնում: Զենքերը վաճառել է նաև այն պատճառով, որ առանց քաշքշուկների ազատվի դրանցից:
Զինված խմբի պարագլուխ Արթուր Վարդանյանին զենք վաճառելու մեղադրանքով մեկ տարի դատապարտվել ու հիմա արդեն ազատ է արձակվել նաև Ստեփան Չիլինգարյանը։ Մեղադրող դատախազի հրապարակած ցուցմունքի համաձայն, Չիլինգարյանը 1996 թվականին իր բնակարանից գտել է պապի պահած զենքերը: Ցուցմունքում նշել է, որ պապը Գյումրիում հարգված մարդ է եղել ու մտերիմ է եղել 2007-ի հոկտեմբերի 27-ին սպանված, Հայաստանի վարչապետ Վազգեն Սարգսյանի հետ: Պապի զենքերը 2300 դոլարով վաճառել է կրկին գյումրեցի տաքսու վարորդ Անուշավան Ավետիսյանին՝ ֆինանսական խնդիրները հոգալու համար: Ցուցմունքում նշել է, որ Արթուր Վարդանյանին չի ճանաչել, նրա մասին հետո է լսել հեռուստատեսությամբ, երբ հայտարարվել է, որ նա ձերբակալվել է: