Facebook. Ռուսական կողմը փորձել է կեղծ օգտահաշիվների միջոցով ազդել ամերիկացի ընտրողների տրամադրությունների վրա
Facebook ընկերությունը չորեքշաբթի երեկոյան պաշտոնապես տեղեկացրել է, որ 2016 թվականի ամերիկյան նախագահական ընտրություններին նախորդող շրջանում ռուսական ծագում ունեցող ընկերությունները շուրջ 100 հազար դոլարի գովազդ են գնել սոցիալական այս ցանցում` նպատակ ունենալով ներազդել ամերիկացի օգտատետերի քաղաքական տրամադրությունների վրա:
Facebook-ի անվտանգության գծով գլխավոր պատասխանատու Ալեքս Ստամոսը նաև նշել է, որ ընկերությունը համագործակցում է նախագահական ընտրություններին ռուսական միջամտության փաստերը հետաքննող կոնգրեսական հանձնաժողովի և Միացյալ Նահանգների արդարադատության նախարարության հետ:
Facebook-ի ներկայացուցիչները երեկ այս առթիվ որոշ մանրամասներ են հաղորդել կոնգրեսականներին: Սոցիալական ցանցի անցկացրած ներքին հետաքննության շնորհիվ հնարավոր է եղել պարզել, որ ռուսական իշխանությունների հետ առնչություններ ունեցող, Սանկտ Պետերբուրգում գտնվող «Ինտերնետ հետազոտությունների գործակալությունը» ընդհանուր առմամբ 3300 գովազդային հայտարարություն է գնել Facebook-ից:
Ամերիկացի օրենսդիրները, սակայն, ենթադրում են, որ սա սոցիալական ցանցերի միջոցով ամերիկյան ընտրություններին ռուսական միջամտության միայն մի մասն է:
«Մենք այսօր միայն նախնական պատասխանը ստացանք, գուցե սա միայն սառցաբեկորի վերին մասն է: Ամիսներ շարունակ մենք Facebook-ի և Twitter-ի ներկայացուցիչներից փորձում էինք պարզել, թե ինչպես է ռուսական կողմը կեղծ օգտահաշիվների միջոցով ազդել ամերիկյան ընտրությունների վրա», - CNN-ին տված հարցազրուցյում հայտարարում էր երեկ հրավիրված լսումների մասնակիցներից մեկը` Վիրջինիայից ընտրված դեմոկրատ սենատոր Մարկ Ուորները:
Facebook-ի ղեկավարները երեկ Կապիտոլիումում կայացած լսումների ժամանակ հայտնել են, որ կարողացել են ռուսների հետ առնչություններ ունեցող 470 կեղծ օգտահաշիվ բացահայտել:
«Գովազդի մեծ մասը նպատակ ուներ խորացնել այն հակասությունները, որոնք առկա են ամերիկյան հասարակության ներսում: Խոսքը ներգաղթի, ռասայական խնդիրների, սեռական փոքրամասնությունների իրավունքների և զենքի ազատ վաճառքի շուրջ առկա տարակարծությունների մասին է», - կոնգրեսականներին տեղեկացրել են սոցիալական ցանցի անվտանգության պատասխանատուները: Նրանց խոսքով, ռուսական կողմի գրանցած ֆեյսբուքյան կեղծ էջերի գործունեությունը թիրախավորում էր այն օգտատերերին, որոնց այս թեմաների կիրառմամբ առավել հեշտությամբ էր հնարավոր ազդեցության տակ գցել:
Ուշագրավ է սակայն, որ ռուսաստանյան ծագում ունեցող կեղծ օգտահաշիվները բավական նուրբ էին կառավարվում` զերծ մնալով անթաքույց քարոզչությունից: «Վճարովի գրառումների մեծ մասում ամերիկյան նախագահական ընտրությունները կամ առաջադրված թեկնածուները հիշատակված չէին», - նշում են Facebook-ի ներկայացուցիչները:
Սենատի և Ներկայացուցիչների տան անդամների մի մասը, սակայն, համոզված է, որ ռուսական կողմը չի բավարարվել բացառապես Facebook-ում կեղծ օգտահաշիվներ գրանցելով ու վճարովի գովազդ գնելով:
«Մենք պետք է խոսենք նաև Twitter-ի ներկայացուցիչների հետ: Ես կարծում եմ, որ ամերիկյան հանրությունը պետք է իմանա, թե ինչ ապատեղեկատվություն կարող է հայտնվել Facebook-ի և Twitter-ի իրենց պատին: Ես կարծում եմ, որ հետաքննության ծավալների ընդլայնմանը զուգահեռ կարող են նոր ապացույցներ ի հայտ գալ: Ես ուրախ եմ, որ Facebook-ը հանդես եկավ այս բացահայտումներով: Ես ավելի շատ հարցեր ունեմ այժմ Twitter-ի ներկայացուցիչների համար», - նշել է կոնգրեսական Մարկ Ուորները: