Վերլուծաբան. «Տարածքների դիմաց խաղաղությունը» Ղարաբաղում տևական խաղաղության չի հանգեցնի
Արմինֆո. «Տարածքների դիմաց խաղաղության» շուրջ բանակցություններ վարելու` Էլմար Մամեդյարովի օրերս հայտնած պատրաստակամությունը երկար սպասված միջանկյալ լուծում է Ադրբեջանի համար: ԱրմԻնֆո-ին այդպիսի կարծիք է հայտնել անկախ վերլուծաբան, Լեռնային Ղարաբաղի նախկին արտգործնախարար Արման Մելիքյանը:
Վերջին շաբաթվան բնորոշ էր լարվածության էական աճը Ղարաբաղի և Ադրբեջանի զորքերի շփման գծում: Ադրբեջանական դիպուկահարները սպանեցին ԼՂՀ պաշտպանության բանակի երեք զինծառայողների, ինչից հետո կառավարվող հրթիռով վնասվեց ԼՂՀ ՊԲ «Օսա» ԶՀՀ:
Այդ ամենից հետո Ադրբեջանի արտգործնախարար Էլմար Մամեդյարովը հայտարարեց, որ Բաքուն պատրաստ է բանակցություններ վարել «տարածքների դիմաց խաղաղության շուրջ»: Այլ խոսքով` Ադրբեջանի ղեկավարությունը խոստանում է հայ զինծառայողներին չսպանել` ի պատասխան որոշակի շրջաններից զորքրը դուրս բերելու համաձայնության: Սակայն, ի պատասխան` ԼՂՀ ՊԲ մարտական հերթապահություն իրականացնող ստորաբաժանումները դիմեցին պատժիչ գործողությունների, ինչի արդյուքնում ոչնչացվեց Ադրբեջանի ԶՈՒ մի քանի օբյեկտ:
«Արցախի հարավային արաքսամերձ շրջաններից և արևելյան գոտուց հայկական ուժերի դուրս բերման արդյունքում հարյուր հազարավոր ադրբեջանցիներ կբնակեցվեն Մեղրիի, Կապանի, Գորիսի, Բերձորի, Ստեփանակերտի և Մարտակերտի անմիջական հարևանությամբ: Այդ ամենը կվերահսկեն Ացախում մտեղակայված ռուս խաղաղապահները, որոնք տեղում կորոշեն, թե որտեղով է անցնելու նոր փաստացի բաժանարար գիծը, և ժամանակի ընթացքում այն ում օգտինէ փոխվելու», - նշել է նա: Վերլուծաբանը հատկապես ընգծել է, որ «տարածքների դիմաց խաղաղություն» բանաձևը Մամեդյարովից ամիսներ առաջ հնչեցրել են ռուսական քաղաքական և փորձագիտական շրջանակների ներկայացուցիչները: Նրա գնահատմամբ, դրա իրագործման միջոցով Ադրբեջանին կհաջողվի առանց գեթ մեկ զոհի և հատուկ ջանքերի վերցնել Արցախի տարածքի կեսը և ստանալ նոր ռազմավարական դիրքեր:
«Այդ բացարձակ ստահոդ և մերկապարանոց հայտարարությունների համաձայն, իբր, հնարավոր է հաստատել տևական խաղաղություն և ամրատախիլ անել թշնամանքը: Սակայն, այդ բանաձևի իրագործումից շատ չանցած Ադրբեջանը, առանց վարանելու, ամեն մի հարմար պահ կօգտագործի Հայաստանի վերը նշված քաղաքներին հարվածելու համար և կփորձի զավթել Աարցախն ու Սյունիքը», - ամփոփել է վերլուծաբանը: