Լոմբարդի. Վատիկանում կտեղադրվի Գրիգոր Նարեկացու հուշարձանը
Իր ելույթների բոլոր տեքստերը Հռոմի Պապ Ֆրանցիսկոսը հաստատում է անձամբ: Այս մասին հունիսի 24-ին Երևանում հայտարարեց Սուրբ Աթոռի մամուլի կենտրոնի ղեկավար Ֆեդերիկո Լամբարդինին, անդրադառնալով այն փաստին, որ Պոնտիֆիկը ՀՀ նախագահի հետ հանդիպման ընթացքում մի քանի անգամ շեղվեց ելույթի սկզբնական տարբերակից, մի քանի անգամ գործածելով «ցեղասպանություն» եզրույթը, երբ անդրադառնում էր 1915 թվականին Օսմանյան կայսրությունում տեղի ունեցած իրադարձություններին:
«Մենք միշտ պատրաստում ենք տեքստերը, բայց միշտ էլ պետք է պատրաստ լինենք անակնկալների: Պապը որոշեց օգտագործել այդ եզրույթը, նա արեց նաև այլ իմպրովիզացիաներ: Դա նրա որոշումն էր: Պապը երբեք չի խուսափել «Հայոց ցեղասպանություն» եզրույթի օգտագործումից»,-ընդգծեց նա, հավելելով, որ նախորդ Պապերը նույնպես ազատ էին իրենց հայտարարություններում, ոչ ոք նրանց չէր սահմանափակում:
Նա հավելեց, որ Հռոմի Պապը ոչ միայն արտասանեց «Հայոց ցեղասպանություն» բառակապակցությունը, այլ նաև ընդգծեց, որ այդ ողբերգությունը, որը գլխավորում է անցյալ դարի համամարդկային աղետների ցանկը, և որը տեղի ունեցավ ռասիստական, գաղափարական և կրոնական պատճառներով, մթագնեցրել էր մարդասպաների բանականությունը, որոնք մտադրել էին ոչնչացնել ամբողջ ժողովուրդների:
Խոսելով Հայոց ցեղասպանության վերաբերյալ փաստաթղթերն ուսումնասիրելու նպատակով Վատիկանի արխիվները բացելու մասին, Լոմբարդինին նշեց, որ դրանք արդեն վաղուց բաց են և ակտիվորեն ուսումնասիրվում են:
Ամփոփելով Հայաստանում Պոնտիֆիկի առաջին օրվա արդյունքները, Լոմբարդինին հայտարարեց, որ Ֆրանցիսկոսը երջանիկ է, որ գտնվում է հայկական հողում, թռիչքն անցավ հաջող, որի ընթացքում նա շփվեց լրագրողների հետ և իր դիրքորոշումն արտահայտեց ԵՄ-ից Մեծ Բրիտանիայի դուրս գալու կապակցությամբ:
«Պապին շատ ջերմ ընդունեցին Հայաստանում: Մայր Աթոռ Սուրբ Էջմիածնում նա ջերմ հանդիպում ունեցավ Ամենայն Հայոց Կաթողիկող Գարեգին Բ-ի հետ, որի ընթացքում նրան հարձնեց Տիրամոր նկարը: Իր հերթին, Կաթողիկոսը Պապին նվիրեց Ֆրանցիսկոսի նկարով գավաթ, 1 մլ տարողությամբ: Նախագահի հետ հանդիպումը նույնպես տեղի ունեցավ բարեկամական ջերմ մթնոլորտում: Նրանք նվերներ փոխանակեցին: Ավելին, Սարգսյանը հայտարարեց Վատիկանում Գրիգոր Նարեկացու հուշարձանը կանգնեցնելու նպատակով միջոցներ հայթհայթելու հայկական Սփյուռքի մտադրության մասին: Պապը դրական վերաբերվեց այդ առաջարկին»,-եզրափակեց Լամբարդինին: