Դեսպան. Աշնանը Բունդեսթագը Հայոց ցեղասպանության վերաբերյալ բանաձև կընդունի
Աշնանը Բունդեսթագը Հայոց ցեղասպանության վերաբերյալ բանաձև կընդունի: Այդ մասին հայտարարել է ՀՀ-ում Գերմանիայի դեսպան Մաթիաս Քիեսլերը՝ ներկայացնելով «Գործելով միասին» հայ-թուրքական հաշտեցման ծրագրի առաջին փուլի արդյունքներ:
Դեսպանը նաև նշել է, որ չնայած հայ-թուրքական հաշտեցման գործընթացի սառեցմանը՝ անհրաժեշտ է պահպանել քաղաքական շփումները: ՙՀամոզված եմ, որ միայն դիվանագիտական ջանքերը բավարար չեն հաջողության հասնելու համար, դրա համար անհրաժեշտ է նաև երկու երկրների հասարակությունների ներգրավվածությունը՚,- նշել է նա: Այդ համատեքստում դիվանագետն ընդգծել է ՙԳործելով միասին» ծրագրի իրականացման կարևորությունը, որի շրջանակներում Հայաստանից և Թուրքիայից 10 երիտասարդ այցելել է մի շարք հայկական քաղաքներ, ինչից հետո հաջորդ տարի կայցելեն Թուրքիա: ՙԾրագրի շրջանակներում երիտասարդները կարող են շփվել և քննարկել պատմական իրադարձությունները, որոնք ցավ են պատճառում՚,- հայտարարել է նա:
Նշենք, որ ապրիլի 24-ին Գերմանիայի Բունդեսթագում Հայոց ցեղասպանության ճանաչման վերաբերյալ բանաձևի շուրջ քննարումներ են տեղի ունեցել: Գերմանիայի Բունդեսթագը Հայոց ցեղասպանության ճանաչման և դատապարտման վերաբերյալ բանաձևի առնչությամբ քվեարկությունը հետաձգել է մինչև ապրիլի 30-ը: Այնուհետև այդ ամսաթիվը ևս մի քանի անգամ հետաձգվել է: Նշենք, որ քննարկումների ժամանակ, որոնց մասնակցել է նաև կանցլեր Անգելա Մերկելը, Բունդեսթագի նախագահ Նորբերտ Լամերտը, մասնավորապես, հայտարարել է. ՙԳերմանիան մեղքի իր բաժինն ունի Օսմանյան Թուրքիայում 20-րդ դարի սկզբին կատարվածի համար՚: Նա նաև ընդգծել է, որ խաղաղություն չի կարող լինել, քանի դեռ չի վերականգնվել Հայոց ցեղասպանության զոհերի ժառանգների համար արդարությունը: ՙՕրհան Փամուկը և Հրանտ Դինքն արժանի են մեր աջակցությանը՚,- ասել է նա:
Բանաձևի նախագծում, մասնավորապես, ասվում է. ՙԱվելի քան մեկ միլիոն հայերի էթնիկ զտումները, կոտորածը, զանգվածային ոչնչացումները Ցեղասպանության վառ օրինակ են՚: Նշենք, որ նախօրեին 20-րդ դարի սկզբի իրադարձությունները որպես ՙցեղասպանություն՚ է որակել Գերմանիայի նախագահ Յոահիմ Գաուկը: Անգելա Մերկելը հայտարարել էր, որ դեմ չէ բանաձևում այդ տերմինի օգտագործմանը`նախազգուշացնելով գերմանացի խորհրդարանականներին այդ փաստաթղթի ընդունման դեպքում Բեռլինի և Անկարայի միջև հարաբերությունների հնարավոր վատթարացման մասին: Թուրքական լրատվամիջոցների համաձայն, Թուրքիայի վարչապետ Ահմեդ Դավութօղլուն Գերմանիայի կանցլեր Անգելա Մերկելի հետ հեռախոսազրույցում անձամբ խնդրել է Օսմանյան Թուրքիայում 20-րդ դարի սկզբի իրադարձությունների վերաբերյալ Բունդեսթագի բանաձևում չօգտագործել ՙցեղասպանություն՚ բառը: