ՀՀ կառավարությունում մտադիր չեն զինված խմբի հետ քննարկել նախարարների կաբինետի հրաժարականի հավանականությունը
ԵՐԵՎԱՆ, 22 հուլիսի./ԱՌԿԱ/. ՀՀ կառավարությունում հերքել են հայկական ԶԼՄ–ներում շրջանառվող տեղեկություններն այն մասին, թե կառավարությունը պատրաստվում է հրաժարական տալ` զինված խմբի կողմից ՊՊԾ գնդի շենքի գրավման ֆոնին։
«Հայաստանի իշխանությունները լուրջ չեն համարում զինված խմբի անդամների հետ բանակցություններն այս հարցի շուրջ», – Ինտերֆաքսին ասել է ՀՀ կառավարության աղբյուրը։
Հուլիսի 17–ին` լուսադեմին, մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց, որոնց թվում են` ՀՀ փոխոստիկանապետ Վարդան Եղիազարյանն ու Երևանի փոխոստիկանապետ Վալերի Օսիպյանը, ովքեր գնացել են այնտեղ բանակցություններ վարելու համար։ Հարձակման ժամանակ զոհվել է գնդապետ Արթուր Վանոյանը, տարբեր վիրավորումներով հոսպիտալացվել է 6 մարդ` 5 ոստիկան և մեկ հարձակվող։ Չորեքշաբթի օրվա դրությամբ գրավված շենքից ազատ է արձակվել հինգ պատանդ։
ՊՊԾ գնդի շենքը զավթած անձինք պահանջում են ազատել Ժիրայր Սեֆիլյանին, ով կալանավորվել է շուրջ մեկ ամիս առաջ մի խումբ անձանց կողմից զենք ապօրինի պահելու կասկածանքով։
Հինգշաբթի երեկոյան ՀՀ ԱԺ փոխխոսնակ, ՀՀԿ մամուլի քարտուղար Էդուարդ Շարմազանովը հայտարարեց, որ ստեղծված իրավիճակը քննարկվել է կուսակցության գործադիր մարմնի նիստի ժամանակ` ՀՀ նախագահ Սերժ Սարգսյանի գլխավորությամբ։
«ՀՀԿ–ն կողմ է խնդրի բացառապես խաղաղ կարգավորմանը։ Այսօր թիվ մեկ խնդիրն է անել հնարավոր ամեն ինչ, որպեսզի առանց արյունահեղության, բանակցությունների միջոցով հնարավոր լինի հասնել ստեղծված իրավիճակի հանգուցալուծման», – ասաց Շարմազանովը։
Միաժամանակ, հինգշաբթի հայտնի դարձավ, որ գեներալ–լեյտենանտ, ԼՂՀ խորհրդարանի պատգամավոր Վիտալի Բալասանյանը եկել է Հայաստան և բանակցում է զինված խմբի հետ, որի անդամ Պավել Մանուկյանը հաստատել է, որ բանակցություններին մասնակցում են Բալասյանն ու Հայ առաքելական եկեղեցու Արցախյան թեմի առաջնորդ Պարգև արքեպիսկոպոս Մարտիրոսյանը։
Հինգշաբթի լուսադեմին ոստիկանության աշխատակիցների և ցուցարարների միջև տեղի ունեցած բախումների հետևանքով տարբեր բժշկական հաստատություններ են դիմել 51 տուժածներ, որոնցից 29–ը` ոստիկան։ 16 ցուցարարի նկատմամբ հարուցվել է քրեական գործ։
Բախումների վայրում ներկա է եղել նաև ընդդիմադիր պատգամավոր Նիկոլ Փաշինյանը, ով փորձել է օգնել ցուցարարներին զինված խմբին սնունդով ապահովելու հարցում։
Այդուհանդերձ, նախօրեին երեկոյան պատգամավորը հայտարարեց, որ իրեն «կուլտուրական ձևով խնդրել են ցուցումներ չտալ ակցիայի մասնակիցներին»։ Փաշինյանը հայտարարեց, որ չի հավակնում ղեկավարության և Խորենացու փողոցում անցկացվող ակցիայի համակարգման։ –0–