Երբ ապահովագրում են «անապահովագրելին»
Ապահովագրել այսօր կարելի է ամեն ինչ՝ սկսած մարմնի մասերից՝ մինչեւ մշակութային արժեքներ: Վերջերս, օրինակ, հայտնի դարձավ, որ աշխարհահռչակ կոմպոզիտոր Արամ Խաչատրյանի դիրիժորական փայտիկն ապահովագրվել է «Ռոսգոսստրախ Արմենիա» ընկերությունում:
Banks.am-ը «Ռոսգոսստրախ Արմենիա»-ից հետաքրքրվել է գործարքի մանրամասների, ինչպես նաեւ ապահովագրական այլ հետաքրքիր դեպքերի մասին:
Արամ Խաչատրյանի դիրիժորական փայտիկի ապահովագրությունն իրականացվել է այն տուն-թանգարանից մի քանի ժամով Ար. Խաչատրյանի անվան համերգասրահ տեղափոխելու համար: Փայտիկը տրամադրվել էր Արամ Խաչատրյանի միջազգային մրցույթի հաղթողին՝ փակման արարողությանը նվագախումբը ղեկավարելու համար:
«Ռոսգոսստրախ Արմենիա»-ն իրականացնում է հայաստանյան շուկայի համար «ոչ ստանդարտ» այլ ապահովագրություններ եւս՝ կապված երաժշտական գործիքների եւ թանգարանային նմուշների տեղափոխման հետ:
«Մեծ երաժիշտների՝ տարբեր երկրներում համերգային արշավների ժամանակ երկրից երկիր են տեղափոխվում նաեւ թանկարժեք եւ հազվագյուտ գործիքներ ու սարքավորումներ: Անհրաժեշտություն է առաջանում ապահովագրել դրանց փոխադրման եւ օգտագործման ռիսկերը»,- նշել են ընկերությունում:
Օրինակ, 2015թ. ապրիլի 24-ին Մեծ եղեռնի 100-րդ տարելիցի միջոցառումների շրջանակում Հանրապետության հրապարակում կայացած՝ SOAD-ի համերգի համար Հայաստան էին բերվել սարքավորումներ, որոնց արժեքը գերազանցում էր $8 մլն-ը:
Ընկերությունն ապահովագրել է նաեւ 2012թ. Ազատության հրապարակում տեղի ունեցած աշխարհահռչակ «Կոհար»-ի համերգի ավելի քան £1,5 մլն (շուրջ $2 մլն) արժողությամբ սարքավորումները, որոնք Երեւան էին բերվել Լոնդոնից:
«Ռոսգոսստրախ Արմենիա»-ն 2014թ. ապահովագրել էր Steinway & Sons համերգային ռոյալը, որը Շառլ Ազնավուրի համերգի համար տեղափոխվել էր Կ. Դեմիրճյանի անվան մարզահամերգային համալիր:
Ընկերության իրականացրած թանկարժեք այլ երաժշտական գործիքների ապահովագրությունների թվում են հայտնի իտալացի վարպետներ Գվարներիի, Դիդիեի, Բերգոնցիի 18-րդ դարի գործիքները, ինչպես նաեւ հայ վարպետ Շահեն Երիցյանի աշխատանքները:
«Ռոսգոսստրախ Արմենիա»-ում պատմել են նաեւ թանգարանների նմուշների ապահովագրության մասին, որոնք, բացի թանկարժեք լինելուց, ունեն պատմական եւ մշակութային մեծ նշանակություն.
- 2011թ. Վենետիկի «Կոռեր» թանգարանում տեղի ունեցած հայ գրատպության 500-ամյակին նվիրված «Հայաստան. Քաղաքակրթության դրոշմներ» ցուցահանդեսի 200 թանգարանային նմուշներ՝ հազվագյուտ ձեռագրեր, հնատիպ գրքեր, մանրանկարներ, խաչքարեր, հուշարձանների մանրակերտներ, գորգեր, քարտեզներ,
- 2014թ. Սերգեյ Փարաջանովի ցուցանմուշների փոխադրումը ԱՄՆ՝ ցուցադրության համար,
- 2015թ. Տիգրան Ձիթողցյանի նկարները,
- 2016թ. Մոսկվայում կայացած «Հայաստան. Լինելիության լեգենդներ» ցուցահանդեսին ներկայացված Հայաստանի պատմության թանգարանի, Մայր Աթոռ Սուրբ Էջմիածնի թանգարանի եւ Մատենադարանի եզակի ցուցանմուշներ:
«Չնայած այս գործարքների «ոչ ստանդարտ» լինելու հանգամանքին՝ դրանք ներառված են սովորական գույքի կամ բեռի ապահովագրության դասի ներքո»,- ընդգծել են «Ռոսգոսստրախ Արմենիա»-ում:
Սիրանուշ Սիմոնյան