Բռնցքամարտի հավաքական. Օլիմպիական ուղին

Ռիոյի Օլիմպիական խաղերից առաջ ամենամեծ անակնկալը մատուցեց Հայաստանի բռնցքամարտի հավաքականը:

Ոչ մի ուղեգիր չունեցող բռնցքամարտիկները պարզապես փայլեցին թուրքական Սամսունում կայացած վարկանշային մրցաշարում ու վերադարձան Օլիմպիական 4 վարկանիշով: Եվս մեկ էլ հաջողվեց նվաճել հուլիսին:

Այս արդյունքն աննախադեպ է նորանկախ Հայաստանի պատմության մեջ:

Օլիմպիական խաղերին բռնցքամարտում Հայաստանը առավելագույն մասնակիցներ ունեցել էր 1996-ին Ատլանտայում ու 2008-ին Պեկինում՝ 4-ական:

Ռիո-2016-ում մեր երկիրը ներկայացնելու են Արթուր Հովհաննիսյանը (49 կգ), Նարեկ Աբգարյանը (52 կգ), ԵԱ-ի բրոնզե մեդալակիր Արամ Ավագյանը (56 կգ), Հովհաննես Բաչկովը (64 կգ) եւ Վլադիմիր Մարգարյանը (69 կգ):

Մարզիկներն ու բռնցքամարտիկները բնավ էլ չեն թաքցնում, որ այդքան հաջող հանդես չէին գա, եթե մրցաշարը չանցկացվեր Թուրքիայում, այն օրերին, երբ արցախա-ադրբեջանական սահմանին իրավիճակը լարված էր:

Բոլոր մարզիկների համար Ռիոյի խաղերն առաջինն են լինելու: Նրանք փորձելու են մոտենալ Օլիմպիական խաղերում պատմություն կերտած մեր բռնցքամարտիկների արդյունքներին:

Առայժմ Օլիմպիադաներում միայն նրանից երկուսին է հաջողվել մեդալով վերադառնալ: Հենց առաջին փորձից 1956 թվականի Մելբուռնի Օլիմպիադայում ոսկե մեդալ է նվաճել Վլադիմիր Ենգիբարյանը: Նա խորհրդային 2-րդ բռնցքամարտիկն է, որն Օլիմպիական խաղերից հաղթանակած է վերադարձել: Հայ մարզիկներից դեռ ոչ մեկը չի կրկնել նրա հաջողությունը:

Հաջորդ Օլիմպիական մեդալը հայ բռնցքամարտիկներին հաջողվել է նվաճել 52 տարի անց: 2008-ին Պեկինում բրոնզե մեդալակիր է դարձել Հրաչիկ Ջավախյանը:

Արթուր Հովհաննիսյան (49 կգ)
[[gallery1]]
Ստամբուլյան մրցաշարը Կարեն Աղամալյանի սաները մեկ շնչով անցկացրին. վստահ մեկնարկ, հաղթական շարունակություն ու 4 ուղեգիր: Թեեւ դրանք հեշտությամբ չտրվեցին`մրցակիցներից բացի տղաները պայքարեցին նաեւ մրցավարների, դահլիճում տիրող մթնոլորտի ու անհյուրընկալ տանտերերի հետ:

Առաջինն ուղեգիրն իր հաշվին գրանցեց Արթուրը, որը դուրս եկավ եզրափակիչ,  նվաճեց ուղեգիր ու «կանաչ լույս» վառեց թիմակիցների համար:

Իր ելույթը խաղերում Հովհաննիսյանը սկսելու է օգոստոսի 6-ին:

Նարեկ Աբգարյան (52 կգ)
[[gallery2]]
Երբ ուղեգիր նվաճելու հնարավորություն է ընձեռնվում, այն ամեն գնով օգտագործել է պետք:

Այդպես արեց նաեւ բռնցքամարտի հավաքականից Նարեկ Աբգարյանը: Թեեւ վերջին մենամարտի ժամանակ նա հիվանդ էր ու ջերմություն ուներ, բայց գիտեր, որ ձեռքից եկածը պետք է անել՝ Օլիմպիադա մեկնելու համար:

Աբգարյանի մեկնարկային օրը օգոստոսի 13-ին է:

Արամ Ավագյան (56 կգ)
[[gallery3]]
Նախորդ տարվա Եվրոպայի առաջնության բրոնզե մեդալակիր Ավագյանը մասնակցել էր նաեւ Դոհայում անցկացված վարկանշային ԱԱ-ին, սակայն դրսեւորել իրեն չէր կարողացել:

Սակայն ապրիլին Արամն ավելի վճռական էր տրամադրված ու ոչինչ նրան կանգնեցնել չկարողացավ: Մարզիկին հաջողվեց ապահովել իր տեղը Հայաստանի Օլիմպիական հավաքականում:

Իր ելույթն Ավագյանը սկսելու է օգոստոսի 10-ին:

Հովհաննես Բաչկով (64 կգ)
[[gallery4]]
Նա ամենավերջինը ապահովեց օլիմպիական ուղեգիրը: Վենեսուելայում կայացած պրոֆեսիոնալ բռնցքմարտիկների վարկանիշային մրցաշար Բաչկովը մեկնել էր ուղեգիր նվաճելու հաստատակամությամբ ու դա նրան անել հաջողվեց:

 

Երկու հաղթանակը բավական եղան, որ հայ բռնցքամարտիկը մեկնի իր առաջին Օլիմպիական խաղերին:

 

Օլիմպիական խաղերում նա հանդես է գալու օգոստոսի 10-ին:

Վլադիմիր Մարգարյան (69 կգ)
[[gallery5]]
Իր թիմակիցներից որոշել էր ամեն գնով հետ չմնալ նաեւ Վլադիմիր Մարգարյանը: Բռնցքամարտիկի համար սկզբունքային էր ուղեգիր նվաճելն, ու նա Թուրքիայում ներդրեց բոլոր ուժերն իր երազանքն իրականացնելու համար:

Լավագույն 3-րդ տեղի համար պայքարում Վլադիմիրը  դրսեւորեց իր որակներն ու բերեց 4-րդ ուղեգիրը:

Օլիմպիական խաղերում Մարգարյանը ռինգ է դուրս գալու օգոստոսի 7-ին:

Հասմիկ Բաբայան

Նախագծի գործընկեր