ՌԴ ԱԳՆ–ն ընդհանրություն չի տեսնում Թուրքիայի, Հայաստանի և Ադրբեջանի իրավիճակների միջև
ԵՐԵՎԱՆ, 21 հուլիսի. /ԱՌԿԱ/. Թուրքիայի, Հայաստանի և Ադրբեջանի իրավիճակներն ընդհանուր որևէ հիմք չունեն, հինգշաբթի հայտնել է ՌԴ ԱԳՆ պաշտոնական ներկայացուցիչ Մարիա Զախարովան։
«Մենք մեկնաբանել ենք վերոնշյալ երկրներից յուրաքանչյուրի իրավիճակն առանձին, երբ անհրաժեշտ է եղել»,– ասել է Զախարովան` պատասխանելով ադրբեջանցի լրագրողի հարցին ղարաբաղյան կարգավորման վրա Թուրքիայում և Հայաստանում ստեղծված իրավիճակների ազդեցության մասին։
Միաժամանակ, ըստ նրա, ղարաբաղյան կարգավորման գործընթացն անմիջականորեն կապված է նրա հետ, թե ինչ է կատարվում Հայաստանում և Ադրբեջանում։
«Մենք ելնում ենք նրանից, որ ղարաբաղյան կարգավորման շուրջ այժմ ձեռնարկվող քայլերը, այդ թվում, Ռուսաստանի Դաշնության կողմից, այն գործընթացը, որը շատ ինտենսիվ է սկսվել, չի կորցնի իր դինամիկան, և հույս ունենք, որ այն իսկապես կծառայի առաջընթացի»,– ասել է Զախարովան։
Ըստ նրա, «Լեռնային Ղարաբաղի կարգավորման գործընթացը և այն ազդակը, որ հաղորդվել է, այդ թվում` Մոսկվայի, ՌԴ գերագույն իշխանության մասնակցությամբ, չպետք է դադարի»։
Հուլիսի 17–ին` լուսադեմին, մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց, որոնց թվում են` ՀՀ փոխոստիկանապետ Վարդան Եղիազարյանն ու Երևանի փոխոստիկանապետ Վալերի Օսիպյանը, ովքեր գնացել են այնտեղ բանակցություններ վարելու համար։ Հարձակման ժամանակ զոհվել է գնդապետ Արթուր Վանոյանը, տարբեր վիրավորումներով հոսպիտալացվել է 6 մարդ` 5 ոստիկան և մեկ հարձակվող։ Չորեքշաբթի օրվա դրությամբ գրավված շենքից ազատ է արձակվել հինգ պատանդ։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։ -0-