Уфа-Оренбург юлында авариядә ике бала, бер хатын үлә, өч бала, ике олы кеше имгәнә
9 гыйнварда Уфа-Оренбург юлының 217нче километрында Башкортстан территориясендә коточкыч юл һәлакәте булган. Бу турыда ЮХИДИга сылтама белән «Башинформ» хәбәр итте.
Mitsubishi Lancer машинасы белән Зианчура районында яшәүче 35 яшьлек ир-ат идарә итә. Күмертау ягына таба барганда ул каршыга килә торган Hyundai Solaris автомобиленә бәрелә.
Мәрхүм балалар Hyundai машинасында, мәрхүмә хатын Mitsubishi машинасында була. Hyundai белән идарә итүче 35 яшьлек ир-атны һәм аның пассажирын хастаханәгә озатканнар.
Якынча белешмә буенча, Hyundai машинасындагы 7 яшьлек кыз, 8 яшьлек малай, Mitsubishi машинасындагы 35 яшьлек хатын-кыз һәлак була. Hyundai машинасының 35 яшьлек йөртүчесен, пассажир хатын-кызны хастаханәгә алып киткәннәр. Mitsubishi машинасындагы өч бала — 3, 8 һәм 12 яшьлек малайларны да хастаханәгә озатканнар, диелә бу хәбәрдә.
Әлеге авариядә катнашкан кеше белән видеоны «Башкортстан» телеканалы күрсәтте.
«Каршыга килә торган машинада ике нәни бала булуын беләсезме?» — дип сорыйлар аннан.
«Әйе, беләм, беләм… Ничек шулай булды? Балалар кызганыч… Хәзер мин ничек яшим инде? Ике бала… хатыным», — дип ачыргалана бу ир-ат.