Ինչ է քաղաքական սերնդափոխությունը ՀՀԿ ներսում` ըստ Հովհաննես Սահակյանի
ԱԺ «Հանրապետական» խմբակցության պատգամավոր Հովհաննես Սահակյանը Tert.am–ի հետ զրույցում անդրադառնում է հարցին՝ արդյոք ՀՀԿ-ականների զավակները կարո՞ղ են և պե՞տք է փոխարինեն ԱԺ-ում իրենց հայրերին: Նաև հարցին, թե ինչ է քաղաքական սերնդափոխությունն` ըստ ՀՀԿ-ի։
- Պարո՛ն Սահակյան, հայտնի է, որ ՀՀԿ համամասնական ու ռեյտինգային ցուցակների շուրջ քննարկումները նշանակված են հունվարից հետո: Սակայն արդեն իսկ լուրեր են շրջանառվում, որ ՀՀԿ կարկառուն դեմքերի մի մասը, որն այլևս չի լինելու ԱԺ-ում, ցանկանում է իր փոխարեն ԱԺ-ում տեսնել իր զավակներին: Ի՞նչ է սա, քաղաքական սերնդափոխությո՞ւն:
- Ձեր հարցադրման առաջին մասը հակասեց հարցադրման երկրորդ մասին: Իրոք, նման հարց չի քննարկվել, հունվարից է քննարկվելու: Ինչ վերաբերում է, որ որդիները փոխարինելու են հայրերին և այլն, ժամանակը կգա, ամեն ինչ պարզ կլինի: Եթե այդ որդիները արժանի են և կարող են աշխատել ԱԺ-ում, կարծում եմ` այդտեղ վատ բան չկա: Հետո ինչ, որ իր հայրը բարձրաստիճան պաշտոնյա է, ուրեմն պետք է որդիներին ասենք, թե իրենք չեն կարող պատգամավոր լինել: Եթե խոսքը վերաբերում է արժանավոր որդիներին, ովքեր սովորում են, խելացի են, կարող են օրենսդրական գործունեությամբ զբաղվել:
- Բայց, սովորաբար, խոսքն այն որդիների մասին է, որոնք մշտապես հայտնի են դառնում հասարակությանը ինչ-ինչ քրեական միջադեպերով: Օրինակ` այսօր խոսքը Սյունիքի նախկին մարզպետ Սուրիկ Խաչատրյանի որդու մասին է. անգամ մամուլում այսօր շրջանառվում էր, որ ՀՀԿ-ում ստիպված են եղել ընտրել չարյաց փոքրագույնը, այսինքն՝ հորը:
-Եթե խոսքը նման դրսևորումների մասին է, նման ցանկացած դրսևորման դեմ եմ:
-Իսկ որդիներին հայրերով փոխարինելը կարելի՞ է դիտարկել որպես ՀՀԿ-ի ներսում որոշակի սերնդափոխություն:
– Որպես քաղաքական սերնդափոխություն մենք չենք դիտարկում որպես ավագների որդիների սերնդափոխություն: Օրինակ` մեր ընկերական շրջապատում և քաղաքականության մեջ բազմաթիվ անձինք, որ ակտիվ դերակատարում ունեն, ժամանակին հենց կրտսերներն են եղել: Ժամանակին, Հանրապետական կուսակցությունը մեզ բերեց քաղաքական դաշտ, որպես կուսակցություն ՀՀԿ երիտասարդներիս`շուրջ 4 տասնյակ մարդ, հնարավորություն էր տվել ինքնադրսևորվելու: Այս երիտասարդներիս թիվը մոտ 3-4 տասնյակ մարդ էր` տարբեր ուսխորհուրդներից, բայց կարծես թե մնացինք 4-5-6 մարդ: Այնպես որ, սերնդափոխություն ասելով` դա նկատի ունեմ: Երբ գալիս է երիտասարդ սերունդը, կայանում, անցնում ճանապարհ` կուսակցական խողովակներով, գործադիր մարմիններում` պաշտոններ զբաղեցնելով: Ըստ որում, պարտադիր չէ, որ բարձրագույն: Ես օրինակ, սկսել եմ որպես Բնապահպանության նախարարության նորմատիվա-մեթոդաբանական վարչության առաջատար մասնագետ: Պարոն Շարմազանովն սկսել է ուսուցչի աշխատանքից, Արմեն Աշոտյանը` երիտթևից և ուսխորհրդի նախագահից: Աբրամ Բախչագուլյանը` Կենտրոնական հանձնաժողովից:
-Պարոն Սահակյան, ԸՕ-ով ԱԺ ընտրություններին գնացող քաղաքական ուժերի համամասնական ցուցակների անցողիկ տեղերում պետք է լինեն ազգային փոքրամասնությունների ներկայացուցիչներ: ՀՀ-ում բնակվող ո՞ր ազգային փոքրամասնություններն են ընդգրկվելու և ընտրության ի՞նչ սկզբունքով:
-Ընտրական օրենսգիրքը հետևյալ մեխանիզմն է նախատեսում, որ ընդգրկված լինեն վերջին մարդահամարի արդյունքներով առաջին 4 առավել շատ ՀՀ քաղաքացիներ ունեցող ազգային փոքրամասնությունները: Եթե չեմ սխալվում` դրանք եզդիներն են, ասորիները, հույներն են, ռուսերը: Եթե չեմ սխալվում: Եվ ԸՕ-ով էլ կլինի` առաջին 4 տեղերը զբաղեցնող ազգային փոքրամասնությունների ներկայացուցիչներից:
-Իսկ կուսակցությունում իրենց հետ հանդիպե՞լ եք արդեն, քննարկումներ ունեցե՞լ եք:
-Ինքներդ նշեցիք, որ բոլոր նմանատիպ քննարկումները տեղի կունենան հունվարից հետո: