Ներելը քրիստոնյայի վարքագիծ է, բայց «Մարտիկի» միայն 2016-ի ծրագրերը հրապարակելը չի բավականացնի ինձ. Անահիտ Բախշյանը՝ Արթուր Աղաբեկյանին
«Մարտիկ» հիմնադրամի գումարների ճակատագրի առթիվ «Ժառանգություն» կուսակցության ներկայացուցիչ Անահիտ Բախշյանի ու ԼՂՀ դաշնակցական փոխնախագահ Արթուր Աղաբեկյանի հրապարակային «հակամարտությունը» նոր փուլ է մտնում:
Երևանի քաղաքապետարանի «Բարև Երևան» խմբակցության անդամ Անահիտ Բախշյանը, ով Աղաբեկյանին մեղադրում է 2002 թվականին հիմնադրված «Մարտիկ» հիմնադրամի գումարները մսխելու, դրամական շարժերը հասարակությունից կոծկելու համար, այսօր Armtimes.com-ի հետ զրույցում չի բացառել, որ ԼՂՀ փոխվարչապետ, «Մարտիկ» հիմնադրամի նախագահ Արթուր Աղաբեկյանը կարող է զրպարտության համար դատի տալ իրեն: «Դա առիթ կլինի, որ ես էլ ներկայացնեմ իմ հայցը»,- ասել է Բախշյանը:
Tert.am-ի հարցին ի պատասխան՝ ԼՂՀ փոխվարչապետ Արթուր Աղաբեկյանի օգնական Ազատուհի Սիմոնյանն ասաց, որ Աղաբեկյանը չի պատրաստվում դատի տալ Անահիտ Բախշյանին: «Արթուր Աղաբեկյանն ասում է, որ ներողամիտ է Բախշյանի հանդեպ, նման խնդիր չկա, չի պատրաստվում իրեն դատի տա, իսկ ինչ վերաբերում է «Մարտիկ» հիմնադրամի ծախսերին, որոնք մինչ օրս հրապարակված չեն, մինչև տարեվերջ պատրաստվելու են և հրապարակվելու են էն ծրագրերը, որոնք իրականացվել են 2016-ին»,-ասաց նա:
Անահիտ Բախշյանը Արթուր Աղաբեկյանի ներողամտության առթիվ Tert.am-ի հետ զրույցում ասաց. «Ուրախ եմ: Ներողամտությունը քրիստոնյայի վարքագիծ է, բայց միայն 2016-ի ծրագրերը հրապարակելը չի կարող ինձ բավականացնել, քանի որ «Մարտիկի» ամենամյա հաշվետվություններում նշվում է, որ միլիոններ են ծախսվել «կանոնադրական նպատակների համար», սակայն հայտնի չէ, թե դրանք կոնկրետ ինչ ծրագրեր են և որքանով են նպատակային եղել ու դրանով որքան է բանակի ու զինվորի վիճակը լավացել»: