ЗША абвінавацілі Расею ў абвастрэньні сытуацыі ў Данбасе

ЗША занепакоеныя апошнім выбухам гвалту на ўсходзе Ўкраіны. Пра гэта заявіў на брыфінгу прадстаўнік Дзярждэпартамэнту Джон Кірбі. Ён, у прыватнасьці, адзначыў, што толькі за апошнія два дні ў раёне Дэбальцава былі забітыя 6 украінскіх вайскоўцаў і больш за 30 былі параненыя ў выніку спробы прарасейскіх сэпаратыстаў захапіць дадатковую тэрыторыю Ўкраіны. Гэта, паводле яго, самы высокі паказьнік стратаў людзей за два дні з чэрвеня 2015 году.


Гэта відавочнае парушэньне Расеяй абавязаньняў у рамках менскіх пагадненьняў, заявіў прадстаўнік Дзярждэпартамэнту ЗША і чарговым разам заклікаў Маскву выкарыстоўваць свой уплыў на сэпаратыстаў у Данбасе, каб спыніць гвалт.


У нядзелю ў Данецкай вобласьці пад Дэбальцавам адбыўся бой украінскіх вайскоўцаў з сэпаратыстамі, у якім загінулі пяцёра вайскоўцаў. У наступныя дні сэпаратысты неаднаразова спрабавалі выбіць украінскіх вайскоўцаў зь іх пазыцый.


З пачатку году ў Данбасе загінулі больш за 180 украінскіх вайскоўцаў, за гэты пэрыяд сэпаратысты больш за 12 тысяч разоў парушалі рэжым спыненьня агню.