Դատապարտյալներին վաղաժամկետ ազատելու համակարգն արդյունավետ ու թափանցիկ չէ. ՄԻՊ
Այսօր տեղի ունեցավ ՀՀ մարդու իրավունքների պաշտպանին առընթեր Խոշտանգումների կանխարգելման փորձագիտական խորհրդի ընդլայնված նիստ, որի ընթացքում քննարկվեցին ազատազրկման վայրերում անձի իրավունքների ապահովմանը վերաբերող հարցեր։
Մարդու իրավունքների պաշտպան Արման Թաթոյանը լրագրողների հետ զրուցում նշեց, որ կան վեր հանված խնդիրներ պայմանական վաղաժամկետ ազատման, մահվան դեպքերի, բանտարկյալների առողջության պահպանման հետ կապված, որոնց ուղղությամբ մշակվում են նաև օրենսդրական նախագծեր։
«Մտահոգիչ են մահվան դեպքերը քրեակատարողական հիմնարկներում, անհրաժեշտ է համապարփակ միջոցներ ձեռնարկել. մասնավորապես, կանխարգելիչ ռազմավարություն ունենալ, հատկապես խոսքը վերաբերում է կոնկրետ խմբերին անհատական մոտեցում ցուցաբերելուն, օրինակ՝ անչափահասների, կանանց համար ունենք առանձին պայմաններ, այդ նպատակով մենք արդեն առաջարկներ ենք ներկայացնելու», -ընդգծեց ՄԻՊ-ը։
Ըստ Արման Թաթոյանի՝ մահվան դեպքերը, հատկապես ինքնավնասման պարագայում, կանխարգելելու համար շատ կարևոր է բանտարկյալի ընտանիքի հետ ամուր կապի ապահովումը։
«Սա համարվում է մահվան դեպքերը կանխարգելելու հիմնարար քայլերից մեկը, արդեն օրենսդրական նախագծերի տեսքով ունենք առաջարկները, կքննարկենք։ Դրանք ուղղված են տեսակցությունների թվի ավելացմանը և համակարգն ավելի ճկուն դարձնելուն»,-ընդգծեց Արման Թաթոյանը։
Մարդու իրավունքների պաշտպանը մանրամասնեց, որ կան օբյեկտիվ և սուբյեկտիվ գործոններ բանտարկյալների առողջության հետ կապված խնդիրների մասով։
Օբյեկտիվ խնդիրներից է սարքավորումների, կադրերի պակասը, սուբյեկտիվ խնդիրներից՝ դեպքերը, երբ հենց բժիշկը պատշաճ վերաբերմունք չի դրսևորում, չի դիտարկում որպես սովորական հիվանդ։
Անդրադառնալով վաղաժամկետ ազատման հետ կապված խնդիրներին Արման Թաթոյանն ընդգծեց, որ համակարգն արդյունավետ չէ, բավարար չափով թափանցիկ չէ։
«Դատապարտյալը չունի լիարժեք մասնակցություն այդ համակարգին, մինչդեռ պիտի ունենա, պետք է ճկուն միջոցառումների շնորհիվ քաղաքացիներին պատրաստել ազատման։ Ընդունելի չէ, երբ պետությունը բավարար պայմաններ չապահովելու պարագայում մեկուսացված է պահում դատապարտյալին, և վերջում ասում ենք՝ անձը պատրաստ չէ ազատ արձակման»,- մանրամասնեց ՄԻՊ-ը՝ եզրափակելով, որ քաղաքացիական հասարակության հետ համագործակցելով, օրենսդրական նախագիծ են ներկայացնելու Արդարադատության նախարարություն, ԱԺ։