ԼՂ հակամարտությունը մոտ ապագայում լուծելի չէ. ռուս քաղաքագետ
Լեռնային Ղարաբաղի հակամարտությունը մոտ ապագայում լուծելի չէ: Tert.am-ի հետ զրույցում նման կարծիք հայտնեց Մոսկվայի «Կարնեգի» հետազոտական կենտրոնի գիտական խորհրդի անդամ, քաղաքական վերլուծաբան, անվտանգության հարցերով փորձագետ Ալեքսեյ Մալաշենկոն:
Խոսելով Համբուրգում Ադրբեջանի և Հայաստանի նախագահների հնարավոր հանդիպման մասին՝ քաղաքագետն ասաց. «ԼՂ հակամարտությունը լուծելի չէ: Իհարկե լավ է, որ նախագահները կամ արտաքին գործերի նախարարները հանդիպում են, որովհետև դա օգնում է դուրս գալ այս հակամարտության ճգնաժամային շրջանակներից»:
Ըստ Մալաշենկոյի՝ այն, որ հակամարտությունը լուծվել չի կարող, պայմանավորված է Լեռնային Ղարաբաղի ստատուս-քվոյի՝ կարգավիճակի հետ:
«Ղարաբաղի կարգավիճակն ինչպիսի՞ն է լինելու՝ անկախ պետությո՞ւն է հռչակվելու, Հայաստանի կազմո՞ւմ է լինելու, թե՞ Ադրբեջանի: Այս տարբերակներից ո՞րն է ողջամիտ, ո՞րն է իրականանալի է, ո՞ր տարբերակն է ընդունելի լինելու երկու կողմերի համար՝ ոչ մեկը: Ուրեմն այս հարցն այսպես էլ մնալու է, շարունակվելու են անսահման զրույցներն այն մասին, թե ինչպես պետք է այն լուծել, բայց լուծումն այդպես էլ չի գտնվելու»,- նշեց Ալեքսեյ Մալաշենկոն:
Ռուսաստանցի քաղաքագետը նկատեց, որ կարելի է տրանսֆորմացնել հակամարտությունը՝ թուլացնել լարվածությունը, բայց ոչ լուծել:
«Խնդիրը Ղարաբաղի կարգավիճակն է: Մոտ ապագայում այն լուծել հնարավոր չէ»,- ասաց Ա. Մալաշենկոն: