Նյու Յորքի իշխանությունները չեն օգնի Թրամփին անօրինական ներգաղթյալների արտաքսման հարցում
Նյու Յորքի իշխանությունները չեն օգնելու ԱՄՆ նորընտիր նախագահ Դոնալդ Թրամփին անօրինական ներգաղթյալների ձերբակալության և արտաքսման հարցում: Այդ մասին հայտարարել է Նյու Յորքի քաղաքապետ Բիլ դե Բլազիոն, հայտնում է ТАСС-ը:
Ելույթ ունենալով նյույորքյան Cooper Union քոլեջում՝ դե Բլազիոն նշել է, որ իր գլխավորած քաղաքային ծառայությունները ոչ միայն չեն օգնելու անօրինական ներգաղթյալների որոնման հարցում, այլև մտադիր են հակազդել Սպիտակ տան այդպիսի միջոցներին, եթե կարծեն, որ դրանք խախտում են նյույորքցիների իրավունքները:
«Մենք կօգտագործենք մեր տրամադրության տակ առկա բոլոր միջոցները մեր մարդկանց պաշտպանելու համար»,- ասել է քաղաքապետը:
Նյու Յորքի քաղաքապետարանի տվյալներով՝ քաղաքում այժմ ապրում է մոտ մեկուկես միլիոն անօրինական ներգաղթյալ, որոնց մի մասը գտնվում է տեղի իշխանությունների հովանու ներքո՝ քաղաքում ընդունված վարչաիրավական նորմերի շնորհիվ:
Քաղաքապետը նշել է, որ քաղաքային իշխանությունները դատական կարգով կվիճարկեն դաշնային իշխանությունների կողմից քաղաքում բնակվող մահմեդականներին «գրանցելու» փորձերը, ինչպես նաև հայտնել է, որ քաղաքային ոստիկանությունը չի կատարելու փողոցներում մարդկանց կանգնեցնելու և ստուգելու գործընթացների խստացման կարգադրությունները: