Թուրքիայում անչափահասների հետ սեռական կապի մեջ մտած անձանց ամուսնության միջոցով արդարացնելու օրենքի նախագիծը հետ է կանչվել Մեջլիսից
Թուրքիայում իշխող «Արդարություն և զարգացում» կուսակցությունը խորհրդարանից հետ է կանչել անչափահասների հետ սեռական կապի մեջ մտած անձանց ամուսնության միջոցով արդարացնելու օրենքի նախագիծը:
Թուրքիայի վարչապետ Բինալի Յըլդըրըմը հայտնել է, որ օրենքի նախագիծը կուսումնասիրվի և կքննարկվի Նախարարների խորհրդի կողմից: Այս մասին հայտնում է թուրքական «Ջումհուրիյեթ» պարբերականը:
Նշենք, որ ըստ ներկայացված օրինագծի՝ անչափահասների հետ սեռական կապ ունեցած տղամարդիկ կազատվեն քրեական պատասխանատվությունից՝ անչափահասի հետ ամուսնանալու պարագայում:
Բազմաթիվ բացասական արձագանքներ ստացած օրենքի նախագիծը հասարակական ճնշման արդյունքում հետ է կանչվել խորհրդարանից:
Թուրքիայում կանանց և երեխաների իրավունքների պաշտպանությամբ զբաղվող բազմաթիվ գրասենյակներ, հասարակական կազմակերպություններ և ակտիվիստներ օրենքի այս նախագիծը մեկնաբանում էին որպես բռնաբարիչներին պաշտպանող օրենք և պնդում, որ Թուրքիայում մանկահասակ աղջիկների հետ ամուսնությունների դեմ պետք է լուրջ պայքար մղել՝ պետական մակարդակով:
Վարչապետ Յըլդըրըմը փորձել է բացատրություն մտցնել օրենքի նախագծի հետ կապված և հայտարարել է, որ օրենքը միտված չէ անչափահասների հանդեպ սեռական ոտնձգություններ կատարած անձանց պաշտպանելուն, այլ նպատակ ունի կարգավորել որոշակի խնդիրներ, որոնք առաջանում են համաձայնեցված ամուսնությունների դեպքում, երբ կինն անչափահաս է:
«Մանկահասակ աղջիկների հետ ամուսնություններ են լինում, մարդիկ որոշ հեռավոր շրջաններում օրենքից տեղյակ չեն, այդ ամուսնություններից երեխաներ են ծնվում, հետո ընտանիքի հայրն անչափահասի հետ սեռական կապ ունենալու մեղադրանքով բանտ է ընկնում, երեխաները մնում են անհայր»,- բացատրել է Յըլդըրըմը:
Մինչդեռ իշխանության ներկայացուցիչների կողմից արվող մեկնաբանությունները բավարար չեն եղել հասարակության ըմբոստությունը մարելու համար: Թուրքիայի մի շարք քաղաքներում սկիզբ առած բողոքի ակցիաներից հետո օրենքի նախագիծը հետ է կանչվել խորհրդարանից: