Өлөөҥҥө “Хотугу симэх – 2016» ойуу-оһуор быыстапката эдэр талааннары бэлиэтээтэ
Сэтинньи ый 18 күнүгэр оройуоҥҥа бастакы «Хотугу симэх-2016» ойуу-оһуор быыстапката тэриллэн ыытылынна. Эбэҥки норуота өссө ааспыт үйэлэртэн кэлбит биир үтүө үгэспитинэн ойуу-оһуор, иис-уус симэҕин алыба буолар. Өбүгэлэрбититтэн хаалбыт аҕа уустарынан көтөр таҥара анал бэлиэлэринэн, төрөөбүт дойдуга, ийэ айылҕаҕа тапталы ойуулуур-дьүһүннүүр, хотугу норуот олоҕун-дьаһаҕын, ииһин-ууһун кэпсиир дьоро күн буолла. Бу быыстапкаҕа оҕуруонан ойуулаан-оһуордаан иистэнэр иэйэр куттаах иистэнньэҥнэр кытыннылар. Быыстапка кыттыылаахтарын оройуоннааҕы культура салаатын начальнига Надежда Прокопьевна эҕэрдэлээн итии-истиҥ тыллары анаата уонна өрүү кытта туралларыгар баҕарда.
Ойууну-оһуору оҕуруонан симээн утумнаахтык дьарыгырар уран тарбахтаах Өлөөнтөн Киреева К.Г., Стручкова Е.П., Бетту У.М., Николаева Г.Д., Никифорова У.В., Сергеева И.Я., Винокурова М.Е., Корякина С.Р., Павлова М.К., Христофорова М.Н., Дьэлиҥдэттэн Алексеева В.В., Харыйалаахтан Сесенова Р.П., Николаева Х.Н. кытыннылар. Ону тэҥэ оҕо искусствоҕа оскуолатын ойуулуур-дьүһүннүүр кылааһыгар Наталья Владимировнаҕа үөрэнэ сылдьар ураты талааннаах кыргыттарбыт Егорова Маша, Колтовская Маша, Васильева Сайаана, Симакова Саина, Никифорова Юлиана, Степанова Лола, Евсеева Есения, оҕону эбии үөрэхтээһин киинин «Вдохновение» куруһуок иитиллээччилэрэ Спиридонова Дарианна, Бакулева Даяна, Павлова Катя, Семенова Айсена, Павлова Марианна бэйэлэрин айымньыларын кытта билиһиннэрдилэр.
Маастардар тикпит оҕуруо кэрэ оҥоһуктарын кыргыттар кэтэн хааман көрдөрдүлэр. Быыстапканы Өлөөн эбэҥки национальнай оройуон культураҕа салаатын салайааччыта, РФ үөрэҕириитин туйгуна, СР культуратын үтүөлээх үлэһитэ, дьүүллүүр сүбэ бэрэссэдээтэлэ Надежда Прокопьевна Николаева, чилиэннэр Саха республикатын норуот уус-оҥоһуктарга маастара Надежда Павловна Колодезникова, Москватааҕы норуоттар икки ардыларынааҕы «Сокровища Севера-2010» быыстапка лауреата, оҕону эбии үөрэтэр киин директора, модельер-дизайнер Татьяна Викторовна Гоголева, оройуоннааҕы «Золотой наперсток 2011» кыайыылааҕа, «Сокровища Севера-2012» лауреата, Санкт Петербурга ыытыллыбыт бастакы аан дойдутааҕы «Дивный остров» фестиваль бастакы степеннээх дипломана, «Эҥнэкээн» оҕо дьааһылатын иитээччитэ Сардана Васильевна Петрова сыныйан, ырытан көрдүлэр.
Үлэлэр түөрт ирдэбилинэн сыаналаннылар: үлэ тиэмэтэ, оҥоруу техниката, хаачыстыбата, уратыта. Анал номинация кыайыылааҕын дипломнарынан наҕараадаланнылар: «Флористика» — Егорова Маша, «Аксессуар костюма» — Колтовская Маша, «Вышитая картина» — Киреева Клавдия Григорьевна, «Предмет интерьера» — Бетту Ульяна Максимовна, «Украшение (бижутерия)» — Павлова Мария Кирилловна, «Украшение в национальном стиле» — Алексеева Валентина Васильевна, «Этническое украшение» — Никифорова Ульяна Васлильевна, «Костюм» — Винокурова Марианна Егоровна.
Кыттыбыт бары иистэнньэҥнэргэ туоһулуур сертификаттар туттарылыннылар. Харыйалаахтан, Дьэлиҥдэттэн кыттыбыт иистэнньэҥнэргэ, Бенчик Н.В., Корякина С.Р., Николаева Г.Д. көхтөөх кыттыыларын иһин махтанабыт. Аҕам саастаах кыттааччылары Киреева К.Г., Стручкова Е.П., эдэрдэр ортолоругар элбэх оҕолоох ийэлэр Ия Сергеева, Ульяна Никифорова дьиэ түбүгүттэн иҥнибэккэ хас биирдии оҕолоругар анаан оһуор-ойуу оҕуруолаах көстүүмнэри тигэн оҥорбуттарын бэлиэтиэҕи баҕарабыт.
Быыстапка түмүгүнэн кыра кыргыттар ортолоругар үчүгэй буочардаах оҕолор бааллар эбит диэн көрдүбүт, ити салайааччыларын дьаныардаах үлэлэрин түмүгэ, кинилэр улаатан, тарбахтарын талаана сайдан дьоһун киһи буоллуннар. Бастакытын кыттыбыт эдэр ийэлэр тигэллэрин бэлиэтиир наада, дьарыктаах ийэ хаһан баҕарар дьиэ кэргэнигэр, оҕотугар духуобунай кылааты киллэрэр.