Чурапчыга Тыа хаһаайыстыбатын күнүгэр бастыҥ үлэһиттэр наҕараадаланнылар
Ааспыт нэдиэлэттэн саҕалаан Чурапчы улууһугар тыа хаһаайыстыбатын күнүн бэлиэтиир үөрүүлээх дьаһаллар хас биирдии нэһилиэккэ үрдүк таһымҥа ыытылыннылар. Тыа сирин үлэһит дьонугар үтүө өйдөбүлү саҕар бырааһынньык сыллата суолтата дириҥээн иһэр. Ол курдук, хас биирдии нэһилиэккэ улуус баһылыга, улуус аппарата, тустаах тэрилтэ салайааччылара кыттыыны ылаллар. Быйыл улууска 37 хотон үлэҕэ киирэн, үгүс нэһилиэккэ тыа хаһаайыстыбатын уонна олохтоох бэйэ бородууксуйатын оҥорон таһаарааччыларын күнэ, саҥа хотоннор аһыллыыларынан саҕаланна.
Тыа хаһаайыстыбатын бырааһынньыктарын түмэр улуустааҕы дьаһал ааспыт өрөбүлгэ Айылгы сынньалаҥ киинигэр үгүс дьону-сэргэни түмэн, үрдүк таһымҥа ыытылынна. Сарсыарда 10 чаастан бааһынай хаһаайыстыбалар дьаарбаҥкалара, атыы-тутуу иһирдьэнэн-таһырдьанан тэрилиннэ. Икки чаастан ыытыллыбыт өрөгөйдөөх чааска тыа хаһаайыстыбатын миниистирин бастакы солбуйааччы Наталья Дягилева, «Сахаплемобъединения” генеральнай директора Степан Охлопков, Россия таһымнаах Үлэ Геройа Михаил Готовцев кыттыыны ыллылар.
«Быйыл тыа хаһаайыстыбатын министерствота оттооһуҥҥа күрэхтэһии биллэрбитэ. Манна биһиги улуус оттооһуҥҥа тиэрдиллибит сорудаҕы бастакынан толорон бөлөхпүтүгэр кыайыылааҕынан тахсан, МТЗ трактор комплегынан наҕараадаланныбыт. Ону бастыҥ үлэлээхтэргэ туттарабын«,- диэтэ улуус баһылыга Андрей Ноговицын. Онон «Беларусь» тыраахтары Одьулуунтан “Комплекс” хаһаайыстыбата, от охсору Хайахсыттан Прокопий Каженкин хаһаайыстыбата, от мунньарын Болтоҥоттон Афанасий Григорьев ыллылар. 1 из 5 Эмиэ бу бачыымы батыһан, от үлэтин көҕүлүүр сыалтан улууспут баһылыга быйыл саас оттооһуҥҥа нэһилиэктэр икки ардыларыгар күрэх биллэрбитэ. Манна элбэх, хаачыстыбалаах оту бастакынан бэлэмнээн Хайахсыт нэһилиэгэ 150 тыьыынчаны, иккис миэстэни Одьулуун ылан 100 тыһыынчаны, үһүс миэстэҕэ Болтоҥо нэһилиэгэ тахсан 50 тыһыынчалаах сертификаттары туттулар.
Бу күн киэһэтигэр бааһынай хаһаайыстыбалары, сүөһү ас көрөн олорор тыа сирин үлэһит дьонугар бырааһынньыктааҕы дьоро киэһэ ыытыллан, оонньуу-көр көҕүлүттэн ылылынна.