Комбайнчыларга премияләр тапшырылды
Районыбызда аеруча югары күрсәткечләргә ирешкән комбайнчыларга, район башлыгының акчалата бүләкләре һәм Рәхмәт хатлары тапшыру матур традициягә әйләнде.
Бу юлы әлеге бүләккә районда план буенча йөкләмәләрен икенче тапкыр үтәгән комбайнчыларны “Органик групп-Минзәлә” агрофирмасының Якты юл хуҗалыгыннан башланды. Монда Артур Петров бүләкләнде. Ә инде агрофирманың җитәкчесе Илфар Халиков 55 яшен басуда каршылаган комбайнчы Рәвис Сабировка агрофирманың Рәхмәт хатын тапшырды. Югары күрсәткечләргә ирешкән комбайнчыларны район җитәкчелеге күрә белә һәм пәнҗешәмбе көнне район башлыгы урынбасары Камил Нәҗмиев һәм район авыл хуҗалыгы һәм азык-төлек идарәсенең маркетинг һәм җитештерү бүлеге начальнигы Нурлыгаян Нәбиев хуҗалыкка махсус килеп район башлыгының Рәхмәт хатын, премия тапшырды. Хуҗалыкта хәзер рапс суктыруны тәмамлап киләләр. Агрофирманың “Лексион” комбайннары уракны төгәлләгәч Мөслим районына булышырга киткәннәр. Агрофирманың комбайнчылары Леонид Кудрявев, Александр Коршунов, Наил Ибрагимов, Фәрит Гыймазетдиновка да 5 шәр мең сум күләмендә премия һәм район башлыгының Рәхмәт хаты икенче тапкыр тапшырылды. Аннары алар “Мензелинские зори” агрофирмасы Калинин хуҗалыгына юл алды, биредә Эдуард Овчинников, Рәис Абдуллин, Флүс Гыйниатуллин, Индус Ярмиев, Илһам Гыйниатуллин, Илнар Ибраһимов, Фоат Ишмуратовка да шундый ук бүләкләр тапшырылды. Агрофирманың Николаевка хуҗалыгы комбайнчысы Данил Бубековта йөкләмәсен икенче тапкыр үтәгән, ул да 5шәр мең сум күләмендә премия һәм Рәхмәт хаты белән бүләкләнде. “Органик групп-Чулман” агрофирмасыннан Илгиз Шиябетдинов, Хәйдәр Гарипов, Венера Бикмухаметова, Фирдаус Сафин, Динар Ахунов, Разил Гөбәйдуллин,Салават Салахов, “Илнур” КФХсыннан Разиф Нургалиев, Нурмөхәммәт Гарипов, Илфат Гильмиев бүләкләделәр. Аларның һәрберсенә 5 мең сум күләмендә акчалата бүләк һәм район башлыгының Рәхмәт хаты тапшырылды.
Урып-җыюның югалтуларсыз баруында матди кызыксындыру чараларының әһәмияте зур, комбайнчыларыбыз бер-берсе белән ярышып, ярдәмләшеп эшләп уракны оптималь срокларда тәмамладылар. Бу юлы 19 комбайнчы әлеге премияне икенче тапкыр һәм 5 комбайнчы беренче мәртәбә алды.