Язэпхыныгъэ агъэпытэщт
Адыгэ Республикэм и ЛIышъхьэу ТхьакIущынэ Аслъан пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгаз Майкоп» ыкIи АО-у «Газпром газораспределение Майкоп» зыфиIохэрэм ягенеральнэ директорэу Iэрэщыкъо Руслъан IофшIэгъу зэIукIэгъу дыриIагъ.
Республикэм игаз комплекс хэхъоныгъэхэр ышIынхэмкIэ зэрэзэдэлэжьэщтхэ лъэныкъохэм, ащкIэ амалэу щыIэхэм, республикэм ыгъэфедэрэ гъэстыныпхъэ шхъуантIэм ыпкIэ игъом тыгъэным, нэмыкI Iофыгъохэми ахэр атегущыIагъэх.
«Мы аужырэ илъэсхэм Адыгеим хэхъоныгъэшIухэр ышIыхэзэ ыпэкIэ лъэкIуатэ, анахьэу ар зыфэгъэхьыгъэр Тэхъутэмыкъое районыр ары. Ау гухэлъхэр щыIэныгъэм щыпхырытщынхэмкIэ гумэкIыгъоу тызэуалIэрэр энергокIуачIэхэр зэрэтфимыкъухэрэр ары. ПсэупIэ район цIыкIухэр, социальнэ псэуалъэхэр шIыгъэнхэм, инвестициехэр нахьыбэнхэм мы Iофыгъом изэшIохын лъапсэ афэхъущт. Мы лъэныкъомкIэ зэфэхьысыжь дэгъухэр тиIэх: АР-м иминистрэхэм я Кабинетрэ компаниеу «Россетимрэ» зэзэгъыныгъэу зэдашIыгъэм диштэу, илъэсэу тызхэтым ибэдзэогъу киловольти 110-рэ кIуачIэ зиIэ подстанциеу «Адыгейская» зыфиIорэр къызэIутхыгъ. ГумэкIыгъор дэгъэзыжьыгъэным пае гъэстыныпхъэ шхъуантIэр зэбгырызыщырэ станциехэм акIуачIэ хэгъэхъогъэн фае», - къыIуагъ ТхьакIущынэ Аслъан.
Iэрэщыкъо Руслъан къызэриIуагъэмкIэ, республикэм ипащэхэм яшIоигъоныгъэхэр къыдыхэлъытагъэу, къутырэу «Новый сад» зыфиIорэм, къуаджэу Хьащтыку ыкIи поселкэу Яблоновскэм ащыIэ мыщ фэдэ станции 3-р гъэцэкIэжьыгъэнхэм иIофыгъо джырэ уахътэм хэплъэх.
Джащ фэдэу программэу «Газпромыр - кIэлэцIыкIухэм апай» зыфиIорэм, нэмыкI социальнэ проектхэм Адыгеир ахэлэжьэным мэхьанэшхо раты. Гъэстыныпхъэ шхъуантIэу агъэфедагъэмкIэ республикэм чIыфэу телъыр зэрипщыныжьырэм, мы лъэныкъомкIэ Iофхэм язытет зэблэхъугъэ зэрэхъурэм бэкIэ ялъытыгъ программэхэм, проектхэм регионыр ахэлэжьэн зэрилъэкIыщтыр.
- СиIэнатIэ сызIухьагъэм къыщыублагъэу пшъэрылъ шъхьаIэу зыфэзгъэуцужьыгъэр илъэс пчъагъэхэм къакIоцI зэIукIэгъэ чIыфэхэм лъапсэу афэхъугъэр зэхэфыгъэныр ары. Ащ пае уплъэкIунхэр зэхэтщагъэх. Ахэм язэфэхьысыжьхэм къызэрагъэлъэгъуагъэмкIэ, Адыгеим чIыфэу телъым иIахь шъхьаIэр гъэстыныпхъэ шхъуантIэр чIэнагъэ зэрэхъурэм епхыгъ. А щыкIагъэр джырэ уахътэм дэтэгъэзыжьы, зипшъэрылъхэр тэрэзэу зымыгъэцэкIэрэ къулыкъушIэхэм пытагъэ хэлъэу тадэзекIощт.«Газпром межрегионгаз» зыфиIорэм ипащэхэм унашъоу ашIыгъэмкIэ, газыпкIэмкIэ республикэм чIыфэу телъыр бэкIэ нахь макIэ хъугъэ, - къыIуагъ Р. Iэрэщыкъом.
Генеральнэ директорым къызэрэхигъэщыгъэмкIэ, непэрэ мафэм ехъулIэу Адыгеим чIыфэу телъыр сомэ миллион 670-рэ мэхъу. Илъэсым къыкIоцI ар апщыныжьынэу агъэнафэ, къэзытхырэр «Адыгэ Макъ».
Шъугу къэдгъэкIыжьын, псэупIэхэм гъэстыныпхъэ шхъуантIэр ящэлIэгъэнымкIэ, ар цIыфхэм агъэфедэн амал яIэнымкIэ пэрытныгъэ зыIыгъ шъолъырхэм Адыгеир ащыщ. 2016-рэ илъэсым щылэ мазэм и 1-м ехъулIэу республикэм щыпсэурэм ипроцент 84,83-мэ газыр аIэкIахьэ, УрысыемкIэ а къэгъэлъэгъоныр гурытымкIэ процент 57,84-рэ, Къыблэ федеральнэ шъолъырымкIэ - процент 78,43-рэ мэхъу.
Гъот макIэ зиIэ унагъохэм гъэстыныпхъэ шхъуантIэр яIэнымкIэ республикэм ипащэхэр IэпыIэгъу зэрафэхъухэрэми ишIогъэшхо къэкIо.