Արցախն անկախ է ու կապ չունի՝ Վրաստանը կճանաչի նրա անկախությունը, թե ոչ. Վրաստանի խորհրդարանի հայազգի պատգամավոր
Ջավախահայերի համար կարևորը Հայոց Ցեղասպանության ճանաչումն է: Tert.am-ի հետ զրույցում այս մասին ասաց Վրաստանի խորհրդարանի հայազգի պատգամավոր Սամվել Պետրոսյանը՝ խոսելով Վրաստանում հոկտեմբերի 8-ին կայանալիք խորհրդարանական ընտրությունների մասին:
«Ջավախքում ապրողներս, 70 տոկոս մարդիկ, ապրում ենք այստեղ 15 թ.-ի այդ ոճրագործությունից հետո: Եթե այն պատգամավորը, որը կարողանա հարցը բարձրացնել Վրաստանի խորհրդարանում, տանի մինչև վերջ, որ հարցը լուծվի, մեծ հաջողություն կունենա: Պետք է պատմական արդարությունը վերականգնվի: Ի դեպ, ասեմ, որ Վրաստանի պատգամավորները, համարյա բոլորը, ինձ հետ համաձայն են, կուլիսներում ինձ ասում են, որ մենք գիտենք, որ եղել է Ցեղասպանություն, բայց կան պետական շահեր, որոնք թույլ չեն տալիս, որ Վրաստանն ընդունի Ցեղասպանությունը՝ լինելով ստրատեգիական գործընկեր Ադրբեջանին ու Թուրքիային»,- նշեց Սամվել Պետրոսյանը:
Պատգամավորը չցանկացավ, սակայն, գնահատել առաջադրված թեկնածուների շանսերը՝ նշելով, որ դրանով կուղղորդի մարդկանց: Սամվել Պետրոսյանն ասաց, որ հայազգի հաջորդ պատգամավորը պետք է կարողանա պաշտպանել հայերի իրավունքը խորհրդարանում, բարձրաձայնի այն խնդիրների մասին, որոնք մտահոգում են Ջավախահայերին:
Բացի այդ, որպես հայության մաս, Պետրոսյանի խոսքով, ջավախահայերն անհանգստացած են Լեռնային Ղարաբաղի հակամարտության կարգավորմամբ: «Ջավախցիները կողմ են այն սկզբունքին, որ խաղաղ ձևով լուծվի Ղարաբաղի հարցը»,- նշեց պատգամավորը:
Հարցին՝ կգա՞ արդյոք պահը, երբ Վրաստանը կճանաչի նաև ԼՂ անկախությունը, Սամվել Պետրոսյանը պատասխանեց. «Իմանալով ղարաբաղցիների բնավորությունը, կարամ ասեմ, որ դա ամեն ինչ ասում է, այդ պետությունը անկախ է ու կապ չունի՝ Վրաստանը կճանաչի այն, թե ոչ»:
Մանրամասները Tert.am-ի տեսանյութում