Համացանցում են հայտնվել լույս հուլիսի 16-ին Էրդողանի ինքնաթիռը թիրախավորած զինվորականների հեռախոսային խոսակցությունները

Թուրքական «Միլլիյեթ» թերթը հրապարակել է Թուրքիայում լույս հուլիսի 16-ին իրականացված հեղաշրջման փորձի ընթացքում նախագահ Ռեջեփ Թայիփ Էրդողանի ինքնաթիռը ոչնչացնել ցանկացող զինվորականների խոսակցությունները:


Հեռահաղորդակցման սարքի և հեռախոսի միջոցով միմյանց հետ կապ պահպանող ապստամբների խոսակցությունների երկու տարբեր հատվածներ ներկայացնում ենք ստորև։


Հուլիսի 16-ին՝ ժամը 00:17-ին, կապիտան Ահմեթ Թոսունն իր անձնակազմի հետ դուրս է եկել թռիչքի՝ F-16 կործանիչով նախագահ Էրդողանի ինքնաթիռը խոցելու նպատակով: Հայտնի է, որ ժամը 1:09-ին նրանք կրկին հետ են վերադարձել՝ առանց գործողությունը կատարելու, և ցածր բարձրության վրա սկսել պտտվել նախագահի նստավայրի շենքի վերևում:


Ահմեթ Թոսուն (ծածկանունը՝ Ֆիլո). Ձեզ ուղղություն կտանք դեպի խոցվելիք ինքնաթիռը, ուղղություն կտանք դեպի խոցվելիք ինքնաթիռը:


Օղուզ Ալփեր Էմրահ (Շահին 2). Լավ: 


Ահմեթ Թոսուն. Ինքնաթիռը, որ պետք է թիրախավորենք, նախագահական է, նախագահական նշան պետք է որ լինի վրան, մեծ, նախագահական ինքնաթիռ է, նախագահական նշանով: 


Օղուզ Ալփեր Էմրահ. Համաձայնեցվեց: 

Պահպանված մյուս հեռախոսային խոսակցությունից պարզ է դառնում, որ Թուրքիայի օդուժի նախկին հրամանատար Ահմեթ Օզթյուրքի փեսա փոխգնդապետ Հաքան Քարաքուշի հրամանով օդային հարվածներ են հասցվել նախագահի նստավայրի մոտակայքում գտնվող որոշ շինությունների և ճանապարհների:



Մուսլիմ Մաջիթ. Նորից կկրկնե՞ք պահանջվող թիրախները:


Հաքան Քարաքուշ. Ճանապարհի խաչմերուկը և մզկիթի դիմացը:


Մուսլիմ Մաջիթ. Ձեր ասած երկու թիրախը հաջողությամբ խոցված է:


Հաքան Քարաքուշ. Հասկանալի է, ձեռքերդ դալար մնան: 

Հուլիսի 15-ի ուշ երեկոյան Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, ով ներկայումս բնակվում է ԱՄՆ Փենսիլվանիա նահանգում: