[b]ИНТЕРНЕТТА АКЧА ЭШЛӘП КАРЫЙК[/b]
Сезгә ничектер, тик миңа һәрвакыт вак-төяккә акча кирәк була. Гел әнидән, йә әтидән сорап йөрисе килми, туган көнгә җыелганы тиз тотылып бетә. Уйладым, уйладым да, урамда визиткалар таратканчы, машина юып азапланганчы, Интернетта акча эшләп карарга булдым. Актарына торгач, аңлашылды: шактый табыш булыр кебек!
Беренче эш итеп, виртуаль акча янчыгы кирәк. Мин Веб-мани һәм Яндекс-кошелек ясадым. Веб-мани ышанычлы булып чыкмады. «Оста» егетләр аны ватып ачу әмәлен тапкан. Веб-манида акча бик еш югала, дип язалар форумнарда. Ә Яндекс-кошелекта бер хисаптан икенчесенә күчергән өчен өстәмә про¬цент тотыла.
Иң башта сайтлар карап, акча эшләргә булдым. Серфинг дип атала бу. Төрле сайтларны карап, теркәлеп, кимендә 15 секунд дәвамында торып торырга кирәк. Чөнки ачып-ябып кына куйган өчен акча түләнми. Эзләү системалары 15 секунд торгач кына сине аңлый икән. Көн буена сайтлар актарып утыру файда китермәде.
Шуннан күчтем рекламага. Реклама хатларына җавап биреп утыруда бик авыр хезмәт булып чыкты.
Бер сайтны караган өчен - 2 тиен, бер хатны укыган өчен 20 тиен акча түләнә. Хатлар көнгә бер-ике була, шуннан артыгын бирмиләр. Шулай итеп, мин үзем ике ай буена 22 сум акча эшләдем. Моның өчен көненә 4-6 сайт ачып карадым, 1 хат укы¬дым. Интернетта бик тиз баеп китәргә теләүче яңа кешеләрне -рефералларны җыеп та акча эшләп була. Реферал эшләгән акча¬ның якынча 20 проценты синең хисапка күчә.
Тагын бер ысул - сораштыруларда катнашу. Аена бер-ике тапкыр сораштыруда катнаштым (артыгын бирмиләр) һәм моның өчен 59 сум виртуаль акча эшләдем. Ә ул сумманы интернет кошелекка күчерү һәм кулга алу өчен хисапта кимендә 100 сум акча булырга тиеш.
Чын-чынлап акча эшләү берничә ай интеккәч кенә булачак, дип ышандыра остарак интернетчылар. Остарып китеп, үз сай-тыңны булдырсаң, кызыклы материал туплап, кешеләрне җый¬саң, реклама сатып акча эшләп була. Тик моның өчен програм¬малауны да белергә кирәк. Кызыклы материалны туплау да гади эш түгел. Авторлык хокуклары турындагы законны истә тотарга кирәк. Интернетта законга каршы эшләр башкарып кую бик җиңел. Ә законны белмәгән бу дип, җәзасын бирми кал¬мыйлар.
Тагын бер ысул бар - ул рерайтинг дип атала. Мәкаләләр язудан гыйбарәт ул. Эше бик күп, мәктәп укучыларының гына көче җитмәс, бу сиңа диктант язу гына түгел. Акчасы да бик аз. Мин монысына тотынып та карамадым.
Тиз акча вәгъдә итүче сайтларда теркәлергә ашыкмагыз -алдыйлар анда. Виртуаль акча эшләүнең нечкәлекләре бик күп, табыш алу җиңел түгел. Кыскасы, бушка акча эшләп булмый... Интернетта да.
Сәхифәнең админы – Булат Газимов.
