Ռոբերտ Քոչարյանի առանձնատան ուղղությամբ նռնակ նետած Հ. Մուրադյանը ուղեգրվել է «Նուբարաշեն» հոգեբուժական հիվանդանոց
Արաբկիր Քանաքեռ-Զեյթուն վարչական շրջանների ընդհանուր իրավասության դատարանը բավարարել է ՀՀ երկրորդ նախագահ Ռոբերտ Քոչարյանի առանձնատան բակի ուղղությամբ ուսումնական նռնակ նետելու մեջ մեղադրվող 34-ամյա Հովհաննես Մուրադյանին ապրիլի 21-ին դատահոգեբուժական փորձաքննության ենթարկելու մասին քննիչի որոշումը և ի կատարումն՝ մեղադրյալը տեղափոխվել է «Նուբարաշեն»-ի հոգեբուժական հիվանդանոց:
Այս մասին Tert.am-ի տեղեկությունները հաստատելով` հայտնեցին ՀՀ քննչական կոմիտեից, մանրամասնելով. «Քննիչը որոշում էր կայացրել Հովհաննես Մուրադյանի նկատմամբ ստացիոնար հոգեբուժական փորձաքննություն նշանակելու մասին, որի կատարումը հանձնարարվել է Արդարադատության նախարարության «Նուբարաշեն» հիվանդանոցի ստացիոնար դատահոգեբուժական փորձաքննությունների բաժնի փորձագետներին: Ինչպես նաև միջնորդություն էր ներկայացվել Արաբկիր Քանաքեռ-Զեյթուն վարչական շրջանների ընդհանուր իրավասության դատարան` նրան դատահոգեբուժական փորձաքննություններ բաժին տեղափոխելու վերաբերյալ»։
Հիշեցնենք, որ Հովհաննես Մուրադյանը մեղադրվում է ՀՀ քրեական օրենսգրքի 258 հոդվածի 1-ին մասով (Խուլիգանությունը՝ դիտավորությամբ հասարակական կարգը կոպիտ կերպով խախտելը, որն արտահայտվել է հասարակության նկատմամբ բացահայտ անհարգալից վերաբերմունքով) և ՀՀ ՔՕ 268 հոդվածի 1-ին մասով (Առանց իրացնելու նպատակի զգալի չափերով թմրամիջոցներ կամ հոգեմետ (հոգեներգործուն) նյութեր ապօրինի պատրաստելը, վերամշակելը, ձեռք բերելը, պահելը, փոխադրելը կամ առաքելը պատժվում է ազատազրկմամբ՝ առավելագույնը մեկ տարի ժամկետով):
Ւ դեպ, վերջին մեղադրանքը՝ թմրամիջոցի մասով, Մուրադյանը չի ընդունում:
Հովհաննես Մուրադյանի պաշտպան Մարինե Ֆարմանյանն էլ Tert.am-ի հետ զրույցում ասաց, որ իր պաշտպանյալը «գնաց ստացիոնար բուժման»: