Վարչապետն ասաց, որ մինչև մայիսի 10-ը մեր փողերը կտան. քաղցրաշենցիները` կառավարության դիմաց
13:52
Քիչ առաջ Կառավարության շենքից դուրս եկան քաղցրաշենցիները, ովքեր հանդիպեցին վարչապետ Հովիկ Աբրահամյանի հետ՝ պահանջելու նրանից իրենց տալ մթերված խաղողի գումարները:
«Գոհ ենք, շնորհակալ ենք մեր վարչապետից, մեր հույսն ինքն էր… Էսօր կտա, ասեց կտա: Մենք հավատում ենք, որ կտա»,- ասաց գյուղացիներից մեկը:
Լրագրողներից մեկի դիտարկմանը, թե մի քանի անգամ հավաստիացրել է, որ կտա գումարները, բայց չի տվել, գյուղացին ասաց, որ «մինչև մայիսի 10-ը երկու կամ երեք «պատոկով» կտա»:
ՀՀ կառավարության առջև բողոքի ցույց են իրականացնում Քաղցրաշեն գյուղի բնակիչները՝ մթերված խաղողի դիմաց գումար չստանալու համար: Գյուղացիները պնդում են, որ իրենց մթերված խաղողի դիմաց գումարները հինգ ամսից ավել է չեն տրվում, որովհետև Գինու գործարանը ֆինանսական խնդիրներ ունի:
«Նախարարը հարցազրույց էր տալիս, լրագրողը հարցրեց, ասեց, որ գյուղացիներն ասում են, թե 40 դրամով խաղող են ընդունել, բայց արի ու տես, որ չեքերը մոտն են, դրանից հետո խաղողի փողերը չեն տալիս: Բավական շատ գործարաններ կան, բայց չեն տալիս, ու հարցը տասը կամ քառասուն դրամը չի, մի լումա է, մենք չենք կարողանում ապրել, ոչ լույսի փողն ենք տալիս, ոչ գազի: Մենք ողորմություն չենք ուզում, մենք մեր գումարն ենք ուզում»,- հայտարարեց գյուղացիներից մեկը՝ նշելով, թե կառավարությունից պարբերաբար ասում են, որ գումարները կտան, բայց «կուտ են տալիս, խաբում են»:
Մեկն էլ հիշեցրեց, որ վարչապետը նախորդ նիստից հետո իրենց խոստացել է տալ գումարները, բայց իրենք այսօր էլ հավաքվել են գործադիրի առաջ, որովհետև գումարները չեն տվել:
«Դաշտը անտեր ենք թողել, տունը անտեր ենք թողել: Թող պատասխան տան՝ ինչի չեն տալիս մեր գումարը: Մարդ կա 150 հազար փող ունի ստանալու: Ինչ մի փող ա, որ չեն տալիս, երբ գիշեր ու ցերեկ վազել ենք էդ «զավոդի» համար»,- ասաց մյուս գյուղացին:
Նրանցից մի քանիսը հրավիրվեցին գործադիր՝ հարցը քննարկելու համար:
Ապա ցուցարարների բողոքը լսելու համար ներքև իջավ ՀՀ էկոնոմիկայի նախարար Արծվիկ Մինասյանը: «Լավ է լինելու… եթե տենաք խաբում են, կգաք ինձ մոտ»,- ասաց Մինասյանը՝ դիմելով իրեն բողոքող կանանց: