Զոհվածների ընտանիքներին հասցեական աջակցություն ցուցաբերելու վերաբերյալ կարգը մշակվել է. Արծվիկ Մինասյան
ՀՀ էկոնոմիկայի նախարար Արծվիկ Մինասյանն այսօր կառավարության նիստից հետո լրագրողների հետ ճեպազրույցում անդրադառնալով վարչապետի հանձնարարականին՝ զոհվածների ընտանիքներին հասցեական աջակցություն ցուցաբերելու վերաբերյալ, ասաց, թե կարգը մշակվել է:
«Հիմա ներքին շրջանառության մեջ է: Դրանով նախատեսվում է զոհվածների ընտանիքներին ներգրավվել եկամտաստեղծ գործունեության մեջ: Դա նշանակում է փոքր ու միջին բիզնեսի ծրագրերի շրջանակներում նախ բացահայտել կարիքները, կատարել համապատասխան ուսումնասիրություն՝ ինչ բիզնեսի կամ եկամտաստեղծ գործունեության մեջ կարող են անձինք ներգրավվել և դրան համապատասխան աջակցության սխեմա ներկայացնել»,-ասաց Արծվիկ Մինասյանը:
Նա նշեց, որ աջակցության սխեմաները տարբեր են՝ սկսած տեխնիկական աջակցությունից, օրինակ որևէ բնակավայրում եթե մարդը կարիք ունի գյուղատնտեսական տեխնիկայի, կամ եթե քաղաքաբնակ անձինք են, ապա նրանք կարիք ունեն փոքր մշտական բիզնեսի:
«Յուրաքանչյուր դեպքի համար նախատեսվում է, որ առանձին կարիքների գնահատում, և ծրագիր պետք է լինի»,-ասաց էկոնոմիկայի նախարարն ու հավելեց, թե խոսքը ոչ միայն ապրիլյան դեպքերի, այլ ազատամարտի ընթացքում բոլոր զոհվածների ընտանիքների մասին է:
«Վստահ եղեք, որ մեխանիզմները, որոնք առաջարկում ենք, ունենալու են նաև անհրաժեշտ ֆինանսական ապահովվածություն: Մենք այսօր բյուջեով կիրականացնենք որոշակի ծրագրեր, միաժամանակ բաց կպահենք նաև մասնավոր փոխանցումները, նաև աշխարհասփյուռ հայության փոխանցումները, ժամանակի ընթացքում բոլորին էլ անդրադարձ կլինի»,-եզրափակեց Արծվիկ Մինասյանը:
Հիշեցնենք, որ կառավարության նախորդ նիստի ընթացքում վարչապետ Հովիկ Աբրահամյանը ՀՀ էկոնոմիկայի նախարար Արծվիկ Մինասյանին հանձնարարական տվեց մարտական գործողությունների արդյունքում զոհված անձանց ընտանիքների համար կայուն եկամտի աղբյուր ստեղծելու նպատակով մշակել և հնարավորինս սեղմ ժամկետում ՀՀ կառավարություն ներկայացնել համապարփակ առաջարկություն՝ նշելով նաև ֆինանսավորման աղբյուրները: