Ընդդիմությունը հայտարարում է ձերբակալված ակտիվիստ Գասպարիի առողջական վիճակի վատթարացման մասին, արդարադատության նախարարը՝ հերքում դա
Փետրվարի 19-ին ձերբակալված ակտիվիստ Վարդգես Գասպարին իր առողջական վիճակի կամ ՙՆուբարաշեն՚ ՔԿՀ-ում պահման պայմանների առնչությամբ որևէ բողոք չի ներկայացրել: Այդ մասին ԱԺ ամբիոնից հայտարարել է արդարադատության նախարար Արփինե Հովհաննիսյանը՝ ի պատասխան ՙԺառանգություն՚ խմբակցության ղեկավար Զարուհի Փոստանջյանի հայտարարությանը, որ ակտիվիստի առողջական վիճակը ՔԿՀ-ում վատթարացել է և խցակիցները խոշտանգումների են ենթարկում նրան:
Արդարադատության նախարարը հավաստիացրել է, որ նույնիսկ բժիշկների հետ հանդպման ժամանակ Գասպարին իր առողջությունից չի գանգատվել, իսկ խցում նա գտնվում է ընդամենը մեկ կալանավորի հետ, որի նկատմամբ որևէ բողոք չի ներկայացրել: Այնուամենայնիվ, Հովհաննիսյանը խոստացել է իրավիճակն իր անմիջական հսկողության տակ պահել:
Մինչդեռ Փոստանջյանը խորհրդարանում հավաստիացրել է, որ Գասպարիին խոշտանգումների են ենթարկում ՙՆուբարաշեն՚ ՔԿՀ-ում, նրա վրա սառը ջուր լցնում և ծեծի ենթարկում: Իսկ նախօրեին նրան բռնի կերպով տեղափոխել են հոգեբուժական կենտրոն, սակայն փաստաբանների ջանքերի շնորհիվ կրկին վերադարձվել է ՙՆուբարաշեն՚ ՔԿՀ: Փոստանջյանը հավաստիացրել է նաև, որ Գասպարին առողջական վիճակից գանգատվել է իր փաստաբաններին: Նա ընդգծել է, որ ակտիվիստին ձերբակալելու վերաբերյալ որոշումն անօրինական էր, քանի որ դատարանի կողմից այն կայացվել է մեղադրյալի բացակայության պայմաններում
Երևանի Շենգավիթ համայնքի ընդհանուր իրավասության դատարանը փետրվարի 19-ին բերման է ենթարկել քաղաքացիական ակտիվիստ Վարդգես Գասպարիին: Ինքը` ակտիվիստը նիստին ներկա չի եղել: Մեղադրյալի բացակայությամբ որոշում ընդունելը, ըստ նրա փաստաբան Դավիթ Գյուրջյանի, օրենքի խախտում է: Նիստից հետո ակտիվիստի տուն են եկել ոստիկանները, փողոց են դուրս բերել պառկած վիճակում գտնվող ակտիվիստին և նստեցրել մեքենա: Ակտիվիստն ու նրա փաստաբանը դեռ չեն ստացել ձերբակալության մասին դատարանի որոշումը, բայց արդեն հայտարարել են, որ այն կբողոքարկեն: Գասպարին մեղադրվում է ոստիկանին վիրավորելու մեջ: Նա դատական նիստերին չէր ներկայանում, և ամեն անգամ իրավապահները նրան ուժով էին բերման ենթարկում: Վերջին անգամ այդ նպատակով օգտագործվել է շտապ օգնության մեքենան: Գասպարիի կողմից կիրառվող բողոքի ավանդական միջոցը պառկած ցույցն է: Նման ակցիաների համար նա բազմաթիվ անգամ տուգանվել է: Ակտիվիստը հիմնականում հանդես է գալիս օլիգարխների և ոստիկանության ղեկավարների դեմ: