21 февраль Халыкара туган тел көнен билгеләп үттек
Алтын җыйма,
йортлар куйма.
Мираска дип балаңа.
Иң кадерле мирас итеп,
Туган телең бир аңа.
21 февраль Халыкара туган тел көнен билгеләп үттек. ЮНЕСКО Генераль директоры әлеге көнне “Ана теле бер булыр” исемле докладында “Халыкара туган тел көнендә барлык телләр дә тигез дәрәҗәдә итеп таныла, чөнки һәр тел кеше халәтенә бердәнбер җавап һәм без сакларга тиеш тере мирас булып тора”, дип әйтә. Безнең Балык Бистәсе 2 нче урта гомуми белем бирү мәктәбе дә шушы тере мирасны саклау рухында эшли. Мәктәбебездә Халыкара туган тел көне уңаеннан уздырыла торган сыйныф сәгатьләре, әдәби-музыкаль кичәләрдә, оештырылган китап күргәзмәләрендә укучыларның игътибары телләрне саклау, үстерү мәсьәләләренә юнәлтелә. Бездә төрле милләт балалары укуын истә тотып, бу чаралар төрле телләрдә уздырыла. Һәр укучыга үз туган телендә чыгыш ясарга мөмкинлек бирелә. Илебездә телләрне саклау һәм үстерү буенча алып барылган күпкырлы сәясәтнең юнәлешләре ачыклана. Һәр укучының туган телен саклауга керткән өлеше билгеләнә, нәтиҗәләр ясала.
Бу уку елында да Халыкара туган тел көненә багышлап узган “Иң татлы тел–туган тел”, дип аталган әдәби-музыкаль кичә күпләрнең күңеленә хуш килде. Сәхнәдән төрле телдә шигырьләр яңгырады, моң агылды. 9 нчы сыйныф укучысы Эльвира Усманова, 11 нче сыйныф укучысы Булат Хәбибуллин башкарган җырларны тамашачылар алкышларга күмде. Таджик милләтеннән булган укучыбыз Хушбахт Панжиев туган телендә шигырь сөйләп күпләрнең игътибарын үзенә җәлеп итсә, таджик милләтеннән булган кызыбыз Хомидабону Шамсудинова татар телендә шигырь сөйләп таң калдырды.
Туган телебезне саклау һәм үстерү безнең изге бурычыбыз. Телебезне ямьсез сүзләр белән чуарламыйча, аны чүпләмичә киләчәк буыннарга тапшыру безгә буыннан-буынга калган мирас. Бу мирасыбызны саклыйк һәм мәңгелек итик.
Гөлүсә Хәлилова.
татар теле һәм әдәбияты укытучысы.