Անելիք Բանկը գործարկել է «Ռուբլի+» նոր ավանդատեսակը, տարեկան 6.25% տոկոսադրույքով
Անելիք Բանկը շուկա է դուրս բերել «Ռուբլի+» նոր ավանդատեսակը, տարեկան 6.25% տոկոսադրույքով: Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, Անելիք Բանկը ՌԴ ռուբլով խնայողություններ ունեցողներին առաջարկում է ներդնել իրենց միջոցները բանկում նոր գործարկված «Ռուբլի+» ավանդատեսակով:
«Մեր մասնագետների կողմից մշակվող և բանկում ներդրվող նոր ավանդատեսակներն առավելապես նպատակաուղղված են օգնել մեր հաճախորդներին շահավետ տնօրինել իրենց դրամական միջոցները: Նոր գործարկված «Ռուբլի+» ավանդատեսակով ներդրվող ավանդի նվազագույն գումարը 15,000 ՌԴ ռուբլի է, առավելագույն տարեկան տոկոսադրույքը՝ 6.25%: Այն շատ հարմար է ՌԴ ռուբլի ունեցող մեր հաճախորդներին, ովքեր հնարավորություն ունեն խուսափել ռուբլու փոխարժեքի տատանումներից և զերծ կմնան փոխանակումից առաջացող ավելորդ կորուստներից»,- ասել է «Անելիք Բանկ» ՓԲԸ Հասարակության հետ կապերի պատասխանատու Աստղիկ Մարտիրոսյանը:
Նա նաև նշել է, որ 2015թվականի արդյունքներով, Բանկի ավանդային պորտֆելը կազմել է 55.3 մլրդ ՀՀ դրամ` նախորդ տարվա համեմատ աճելով շուրջ 8%-ով: «Ավելացել են հատկապես ֆիզիկական անձանցից ներգրավված ավանդները՝ 47.2 մլրդ ՀՀ դրամ՝ նախորդ տարվա համեմատ աճելով շուրջ 21.2%-ով»,- ավելացրել է Ա. Մարտիրոսյանը։
Նշենք, որ Անելիք Բանկի միանձնյա սեփականտերն է լիբանանյան Credit Bank S.A.L.-ը, որը 2013 թվականի 4-րդ եռամսյակում իր մասնաբաժինը 89.95%-ից հասցրեց 100%-ի: