Մեկնարկել է կիբեռանվտանգության ռիսկերի կառավարման աշխատաժողովը
Ապրիլի 13-17-ը Երեւանում անցկացվում է «Կիբեռանվտանգության ռիսկերի կառավարում» խորագրով հնգօրյա աշխատաժողովը, որն իրականացվում է ամերիկյան Քարնեգի Մելոն համալսարանի (Carnegie Mellon University) մասնագետների կողմից։
ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանն ընդգծել է, որ ռիսկերի կառավարումը ռազմավարական կարեւորություն ունեցող ուղղություն է բոլոր ոլորտների համար։ Նրա խոսքով՝ առաջացող խնդիրներին հաճախ հնարավոր է արագ լուծում տալ, սակայն առավել էական է դրանց ժամանակին կանխատեսումն ու կանխարգելումը։
Նա նաեւ նշել է, որ կիբեռանվտանգության ռիսկերի ազդեցությունը ենթակառուցվածքների վրա ներկայում չափազանց բարձր է, ինչը պահանջում է առավել պատասխանատու եւ համակարգված մոտեցում: Այս համատեքստում նախարարի տեղակալը կարեւորել է միջազգային առաջավոր փորձի տեղայնացումը Հայաստանում՝ բարձր գնահատելով Քարնեգի Մելոն համալսարանի հետ համագործակցությունը։
Աշխատաժողովը կենտրոնացած է երեք հիմնական ուղղության վրա, որոնք ներառում են եվրոպական NIS2 դիրեկտիվի պահանջներին համապատասխան տեղեկատվական անվտանգության ռիսկերի կառավարման ազգային շրջանակի ձեւավորումը, դրա կիրառման համար անհրաժեշտ գործիքների, գործընթացների ու ուղեցույցների մշակումը, ինչպես նաեւ պետական համակարգում, կրիտիկական ենթակառուցվածքներում եւ թվային տնտեսությունում մասնագիտական կարողությունների զարգացումը։
Միջոցառման նպատակն է պետական գերատեսչությունների, ակադեմիական համայնքի, ոլորտային կազմակերպությունների եւ կրիտիկական ենթակառուցվածքների ներկայացուցիչների համագործակցությամբ նպաստել Հայաստանի կիբեռանվտանգային ռիսկերի կառավարման ազգային շրջանակի մշակմանն ու կարողությունների հզորացմանը։
Հնգօրյա քննարկումների ընթացքում մասնակիցները հնարավորություն կունենան ծանոթանալու միջազգային ստանդարտներին, մշակելու ռիսկերի գնահատման մոդելներ եւ նախանշելու ոլորտային կրթական նպատակները։ Հատուկ ուշադրություն կդարձվի նաեւ առաջադրանքների, գիտելիքների եւ հմտությունների (TKS) քարտեզագրմանը՝ կրթական ծրագրերը աշխատաշուկայի պահանջներին համապատասխանեցնելու նպատակով։
Աշխատաժողովի արդյունքներով կձեւավորվի գործողությունների հստակ պլան, որը կծառայի որպես հիմք Հայաստանի կիբեռանվտանգության համակարգի զարգացման համար։