«Койманың очлы таягында эленеп тора»: төнлә яшь кыз мәете табылган

Пермьдә Кама аръягы микрорайонының Маршал Рыбалко урамында 11 майга каршы төндә бер бар янында яшь кыз мәете табыла. Ул койманың очлы тимер таягында эленеп тора. Бу хакта «Комсомольская правда» сайты хәбәр итә.

«Күрәсең, бу кыз дуслары белән ял иткәндер, исерек булгандыр. Мөгаен, койма аркылы чыгарга теләп, таеп киткәндер һәм егылгандыр», «Коймада очраклы гына килеп чыкканган охшамаган – бик сәер позада. Коточкыч күренеш. Хәзер балаларны да урамга чыгарырга куркыныч», – дип яза Пермьдә яшәүчеләр социаль челтәрләрдә.

Фаҗига урынына полиция һәм «ашыгыч ярдәм» килгән. Урынны камап алганнар.

«Төнге уникенче яртыда безнең бардагы кешеләр парктагы коймада сәер силуэт күрә. Якынрак килгәч, коймада асылынып торган кыз мәете күрәләр. Безгә хәбәр итүгә үк, полиция чакырттык. Бүген хокук сакчылары белән бергә бездәге күзәтү камераларын караячакбыз», – дип сөйләгән «КП-Пермь» басмасына бар хезмәткәре.

Төбәк буенча Эчке эшләр министрлыгы матбугат хезмәтендә хәбәр итүләренчә, якынча мәгълүматлар буенча, кыз бәхетсезлек очрагы аркасында үлгән, көч кулланып үтерү билгеләре табылмаган. Хәзер әлеге факт буенча тикшерү уздыралар, диелә хәбәрдә.