ყურძნის ფასი შემცირდა მისი მოვლა კი მნიშვნელოვნად გაძვირდა

რუსული ბაზრის გამო მოლოდინი ახალ ხელისუფლებასაც მაღალი ჰქონდა და მეღვინეებსაც. რუსულ კრიზისის უკრაინის ომიც დაერთო და ორი უმსხვილესი საექპორტო ბაზარი პრაქტიკულად გაქრა.

თითქმის ყველა ღვინის ქარხანაში, არსებული საცავების 60-70% ისევ ძველი ღვინითაა სავსე, ქარხნების უმეტესობას საკუთარი ვენახები აქვს და გლეხის ყურძნამდე ჯერ იმას ფიქრობს საკუთარი სად წაიღოს.

შარშან ყურძენში გადახდილი მაღალი ფასის გამო მწარმოებლებს ფასების 40%-ით გაზრდაც მოუწიათ, რამაც გაყიდვები კიდევ უფრო დააგდო. შედეგად რუსეთში ქართული ღვინის ექსპორტი 60%-ით დაეცა, მაშინ როცა ევროპელი მეღვინეებისთვის ვარდნა ამ კონკრეტულ ბაზარზე 25%-ს არ გასცილებია, შესაბამისად ხელისუფლებას წელს კვლავაც დასჭირდა სუბსიდია.

მევენახეობა-მეღვინეობის დარგი ბოლო წლებში რამდენიმე დონორმა ორგანიზაციამ შეისწავლა, უმეტესი მათგანი დარგში არსებული სუბსიდიების არაეფექტურობაზე მიუთითებდა, რადგან ის საეჭვო ხარისხის ყურძნის ჭარბწარმოებას ახალისებდა.

სოფლის მეურნეობის სამინისტროს ინფორმაციით, გასული 2 წლის განმავლობაში მევენახეობა-მეღვინეობის დარგმა 300 მილიონ ლარამდე შემოსავალი მიიღო.

ერთი კილოგრამი რქაწითელი შარშან 1 ლარი, ანუ 60 ცენტამდე ღირდა, წლევანდელი ფასებით კი თითქმის 25 ცენტი ღირს, არადა ისევ კურსის წყალობით 20-30%-ით გაძვირდა ვენახის მოვლა-პატრონობა და არც სუბსიდია და არც ფასი საკმარისი არ არის. 

ავტორი: მიშა სესიაშვილი.