Сайлаучыларның 45 проценты үз тавышларын бирде
Әгерҗедәге 4нче мәктәптә урнашкан 460нчы сайлау участогында иртәдән үк җанлылык. Биредә Энгельс, Пушкин урамнары, М.Горький тыкрыгыннан барлыгы 739 сайлаучы үз тавышларын бирергә тиеш.
– Иртәнге сәгатьләрдә пенсионерлар аеруча активлык күрсәтте. Сәгать 10нарга яшьләр дә килә башлады. Сайлаучыларның кәефе яхшы булу безгә эш дәрте өсти, – ди комиссия әгъзасы Сөмбел Муллахмәтова.
Комиссиядәгеләрнең барысы да тәҗрибәлеләр.
– Шушы состав белән инде дүрт сайлау уздырдык. Бик аңлашып эшлибез, – ди Резидә Акбашева.
Участоктан сайлаучылар да өзелеп тормый.
– Сайлауга барасы бар дип атна буе әзерләндем. Аллага шөкер, тыныч, җитеш тормышта яшибез. Пенсияне вакытында китерәләр. Әгерҗебез күзгә күренеп үсә, төзекләнә, яшәү шартлары көннән-көн яхшыра. Шулай булгач ничек сайлауга бармый каласың ди?! – ди Галина Даниленко.
Әнә, милли киемнәрдән Әгерҗе “сандугачлары“ Виктор Власов һәм Ләйсән Тимуршина да ишектән кереп киләләр.
– Бездә төрле милләт халыкларының дус, тату яшәвенә сокланабыз. Менә концерт куярга барганчы тавыш бирергә дип кердек. Без Татарстанда яшәвебез белән горурланабыз һәм аның киләчәктә дә чәчәк атуын телибез, – ди Ләйсән.
Сәгать 11гә бу участокка барлык сайлаучыларның 25 проценты килгән иде.
467нче сайлау участогында беренче тапкыр тавыш бирүче яшь сайлаучыларга “Бердәм Россия“ партиясе әзерләгән бүләкләрне тапшырдылар. Комиссия рәисе Татьяна Мерзлякова егет-кызларның һәрберсенә республикабыз язмышына битараф булмаганнары өчен олы рәхмәтен җиткерде.
– Ижауда нефтьчеләр әзерли торган техникумда белем алам. Бу ялларда махсус сайлауга дип кайттым. Киләчәк – яшьләр кулында. Шулай булгач, мин сайлауга битараф кала алмадым, – ди Кирилл Фомин.
Гомумән, бу көнне сайлау участокларына 347 егет-кыз беренче тапкыр үз тавышларын бирергә килергә тиеш.
Һәр участокта сайлауга килүчеләрне тәм-томнар белән чәй эчерделәр.
Сәгать 11 сәгать 30 минутка райондагы барлык сайлаучыларның 44,74 проценты үз тавышларын бирде.