რაულ ხაჯიმბა საქართველოდან ოკუპირებულ აფხაზეთში ტვირთის შეტანაზე სახელმწიფო კონტროლს ითხოვს
რაულ ხაჯიმბა საქართველოდან ოკუპირებულ აფხაზეთში ტვირთის შეტანაზე სახელმწიფო კონტროლს ითხოვს.
აფხაზეთის დე-ფაქტო ხელისუფლების ხელმძღვანელის განცხადებებს თბილისში გამოეხმაურნენ.
ოპოზიცია რაულ ხაჯიმბას მსგავსი შინაარსის შემცველ განცხადებას დღევანდელი ხელისუფლების სისუსტედ მიიჩნევს.
„ეს განცხადება ორ რამეს მიანიშნებს, - პირველი, რომ დღევანდელი ხელისუფლება აბსოლუტურად არ აკონტროლებს მდგომარეობას საოკუპაციო ხაზზე და გაუგებარი ტვირთები გადის და შემოდის. და მეორე, ის პოლიტიკა, რომელსაც საქართველოს ხელისუფლება რუსეთთან აწარმოებს ამ მიმართულებით, აბსოლუტურად გაკოტრებულია,“ - ამბობს ნაციონალური მოძრაობის წარმომადგენელი, ლევან თარხნიშვილი.
სახელისიუფლებო გუნდში კი ამბობენ, რომ ეს დე-ფაქტო ხელისუფლების მხრიდან მორიგი პოლიტიკური სვლაა და ასეთი სვლები ადრეც ყოფილა.
„ხაჯიმბამ სახელმწიფოთა შორის კეთილი ურთიერთობების შემდგომი განვითარების თემაზე ისაუბრა და ეს თემა არახალია. ეს არის ერთ-ერთი პოლიტიკური სვლა, რომელიც აფხაზური დე-ფაქტო ხელისუფლების ინტერესებშია,“ - ამბობს გია ვოსლკი.
რაულ ხაჯიმბას განცხადებით, აფხაზები საქართველოში მხოლოდ მკურნალობის მიზნით არ ჩადიან.
"ჩვენთან აქტიურად ვითარდება ბიზნესი და ტვირთის მნიშვნელოვანი ნაწილი, რომელიც საზღვარს კვეთს, საქართველოდან შედის,"– აცხადებს ხაჯიმბა.