«Янып торган яшьләр китә...» – КВНчы Ленар Галәветдинов һәлак
Махсус операциядә татар КВНчысы, стендапчы Ленар Галәветдинов һәлак булган. Кайгылы хәбәрне «Әйдә ШаяРТ»ның социаль челтәрдәге сәхифәсендә җиткерәләр.
Безнең өчен авыр югалту... 2022 елда хәрби хезмәткә чакырылган иптәшебез Ленар Галәветдинов батырларча һәлак булды.
Ул солдат кына түгел, талантлы артист та иде. Аның биргән иҗат ялкыны мәңгегә безнең йөрәкләрдә калачак. Аның вафат булуы – гаиләсе, дуслары һәм аны белгән һәркем өчен кире кайтарып булмаслык югалту.
Бу авыр вакытта безнең күңел аның якыннары янында. Без сезнең белән! Туганнарының һәм дусларының кайгысын уртаклашабыз. Урыны оҗмах түрләрендә булсын. Батырга мәңгелек дан! – диелә анда.
Ленар белән хушлашу 21 гыйнвар көнне Мамадыш районының Шәдче авылында була. Вакыты өстәмә рәвештә игълан ителәчәк.
Әлеге пост янында бихисап күп кайгы уртаклашу сүзләре язалар.
«Эх, брат. Галәү», «Урыны оҗмах түрләрендә булсын», «Авыр туфрагы җиңел булсын», «Аллаһ булган гөнаһларын кичерсен», «Яшь җаннар китеп бара...», «Ленар абый, минем өчен син – легенда. Авыр туфрагың җиңел булсын», – диләр.
Татар КВН лигасы җитәкчесе Рамил Агдеев дустын: «Астанага барганда ресторан-вагонны ничек итеп мәзәкләргә күмгән идек… КВН җиле», – дип искә алган.
«Эх, нинди янып торган яшьләр китә. Отпускка кайткан вакыты иде, КВНда жюрида утырдык бит. Моңсу иде Ленар. Стендапларда катнашып, гөрләтеп сәхнәдә басып торган вакыттагыча түгел иде… Караңгы гүрләрең якты булсын», – дип язган Татарстанның халык артисты Зәйнәб Фәрхетдинова.
Татарстанның атказанган артисты Нурзадә дә: «И, Аллам. Урыны оҗмах түрләрендә булсын. Бик кызганыч. Шундый яхшы артист, КВНчы. Нишләп соңгы арада күренми, дип уйлаган идем аны», – дип яза.
17 февраль көнне «Чулпан» мәдәният үзәгендә узачак татарча стендап концертын сәхнәдәш дуслары Ленар Галәветдинов истәлегенә багышлаячак.
Ленарның социаль челтәрдәге сәхифәсеннән видео: