Хакъсыз сабий путёвкала бардыла
Черкесскеде джашагъанланы сабийлери Кавминводланы эмда Къабарты-Малкъар Республиканы санаторийлеринде хакъсыз солургъа боллукъдула.
- Нальчикни «Кавказ» санаторийине 37 сабийни ашырыргъа мадар барды. Ол путёвкала къарыусуз джашагъан, кёб сабийлери болгъан, сакъат сабийлени ёсдюрген юйдегилеге эмда ёксюз сабийлеге берилликдиле. Аны бла бирге джай кёзюуде атала бла аналагъа ишлеген джерлеринде отпуск бермей, сабийлеге къарар адам болмаса, аланы да санаторийлеге ашырыргъа боллукъду, - деб хапар айтханды Черкесскеде мэрияны джамагъатны социал джаны бла джакълагъан управлениесини бёлюм тамадасы Татьяна Семёнова.
«Аны бла бирге бюгюнлюкде Нальчикни «Горный родник», «Радуга»; Нарсананы «Смена», «Пикет»; Железноводскени Крупская атлы сабий санаторийлерине путёвкала табыллыкъдыла. Ары 7 джылдан 15 джылгъа дери сабийлени иерге эркинлик барды. Сёзсюз да, педиатр сабийге санаторийде саулугъун игилендирирге тыйыншлы болгъаныны хакъындан къагъыт берирге керекди. Атаны не ананы паспортуну копиясы, сабийни туугъаныны свидетельствосуну копиясы, юйдегини къурамыны справкасы, сабийни статусун бегитген документле амалсыз керекдиле.
Черкесскеде шахар администрацияны 39-чу кабинетинде баш эмда барас кюнледе толу хапар билирге боллукъду; телефон номер: 26-14-14.