«Ярдәм» мәчете көн саен ифтарда 2 меңнән артык кешене ашата

Илдар хәзрәт Баязитов: «Арабызда төрле төбәкләрдән килгән күрмәүче кардәшләребез бар. Безгә бик күп регионнардан – Дагыстан, Чечня, Башкортстан, Мәскәүдән һәм башкалардан реабилитациягә киләләр. Алар биредә дуслар таба, аралашалар. Аларның догалары безнең өчен зур таяныч. Кайсы гына шәһәргә барсаң да бездә реабилитация узган кешеләргә тап буласың – алар биредәге җылылыкны хәтерлиләр.

Көн саен 2 меңнән артык кешене ашатабыз. Аларның күпчелеге ланч-бокслар итеп әзерләнә. Безнең фонд 2002 елдан бирле шундый ифтарлар уздыра һәм аларның масштабы елдан-ел зурая. Мондагы 2 меңгә өстәп «Сөләйман»да – 200, Балтач районы Бөрбашта 100ләп кеше. Киләсе елдан Апаста да өстәләчәк», – диде ул.

Табындагыларга «Ярдәм» фондының яңа проекты – «Заһретдин» пансионаты тәкъдим ителде. Әлеге өч катлы бина Апаста салынган. Алга таба журналистлар белән анда пресс-тур уздырырга планлаштырыла. Киләчәктә мондый пансионатлар башка районнарда да ачылырга мөмкин – инициатива белдерүче районнар бар, ди. «Безгә Апаста пансионат салырга иң матур урын бирелде, янында спорткомплекс, бассейн бар», – дип сөйләде Илдар хәзрәт Баязитов үзен журналистлар урап алгач. Әлеге пансионат хәйрия фондының дуслары ярдәме белән салына.

«Бүген безнең янга журналист дусларыбыз килде, аларга зур рәхмәт – чөнки программаларыбыз, проектларыбыз турындагы мәгълүматны тараталар. Безнең бу эшләребездә сезнең ярдәмегез зур – бергә булганда эшлибез. Тормыш бик тиз уза, Рамазан кичә генә башланган иде кебек, инде 22нче көне үтте, бер атнадан бетә дә. Тормыш та шулай бик тиз уза, ә без үзебез белән нәрсә алып китәбез? Хәзер шул хакта уйларга тиешбез. Үзебез белән алып китәсе йөгебезне бергәләп әзерлибез», – диде әлеге мәҗлесне йомгаклап, «Ярдәм» мәчете имамы, «Ярдәм» хәйрия фонды рәисе Илдар хәзрәт Баязитов.