Праект „Класіка каля ратушы” будзе рэалізаваны адразу ў пяці гарадах Беларусі
Сёлета свой пяты сезон музычны праект „Класіка каля ратушы” правядзе адразу ў пяці гарадах Беларусі, паведаміла 19 чэрвеня на прэс-канферэнцыі адна з арганізатараў праекта, начальнік аддзела ўстаноў культуры ўпраўлення культуры галоўнага ўпраўлення ідэалагічнай працы, культуры і па справах моладзі Мінгарвыканкама Ганна Шыманская.
Паводле яе слоў, у праекце традыцыйна возьме ўдзел Мінск, другі раз — Віцебск, далучацца Брэст, Гомель і Гродна. Магілёў не ўдзельнічае, аднак арганізатары спадзяюцца, што ў наступным годзе класічныя канцэрты пад адкрытым небам пройдуць і там.
Усяго ў гэтым сезоне заяўлена 10 канцэртаў. „Мы спадзяемся, што ў жыхароў гарадоў, якія далучыліся, гэты праект стане такім жа папулярным, як і ў Мінску”, — сказала Шыманская.
Паводле слоў аднаго з арганізатараў праекта, начальніка ўпраўлення маркетынгавых камунікацый кампаніі velcom | A1 Алены Бычковай, аўдыторыя вечароў ля ратушы штогод расце. „Першапачаткова праект задумваўся як спроба вынесці класічную музыку з камерных сцэнаў на вуліцу. Гэтая спроба ўдалася. Цяпер класічныя вечары сталі неад’емнай часткай гарадской культуры”, — адзначыла яна.
Бычкова звярнула ўвагу, што канцэрты класікі будуць „вельмі сімвалічна” праходзіць у дні культуры розных краін. „Да прыкладу, да Дня культуры Аўстрыі ў Беларусі ў трох гарадах, Брэсце, Гомелі і Віцебску, будзе прэзентаваная спецыяльная праграма „Viva, Штраўс!” у межах вечароў класікі”, — сказала яна.
У сваю чаргу яшчэ адзін прадстаўнік арганізатараў, дырэктар дзяржаўнай установы „Мінскканцэрт” Андрэй Мікуцэвіч, расказаў, што канцэрты каля ратушы традыцыйна іграюць найлепшыя беларускія і замежныя музычныя калектывы, якія „трымаюць высокі ўзровень”. Сёлета адкрые праграму ў Мінску 20 ліпеня Дзяржаўны акадэмічны сімфанічны аркестр на чале з Аляксандрам Анісімавым. Упершыню ў праекце возьме ўдзел Нацыянальны акадэмічны народны аркестр Рэспублікі Беларусь імя Жыновіча — 27 ліпеня. 3 жніўня выступіць музычная капэла „Санорус”, 10 жніўня ў Мінску пройдзе канцэрт эстонскага духавога аркестра „Саксон”. 17 жніўня выступіць Дзяржаўны камерны аркестр Рэспублікі Беларусь, і завершыць вечары 31 жніўня Прэзідэнцкі аркестр Рэспублікі Беларусь пад кіраўніцтвам Віктара Бабарыкіна.
Першы канцэрт у рэгіёнах адбудзецца 29 чэрвеня — на плошчы Перамогі ў Віцебску выступіць калектыў Art Music Orchestra. 3 ліпеня праект перамесціцца ў Гомель на плошчу Леніна — там таксама выступіць Art Music Orchestra. У гэты ж вечар у парку Жылібера ў Гродне выступіць ансамбль „Мінск-Класік”. А 28 ліпеня ў Брэсце яшчэ адзін канцэрт адыграе Art Music Orchestra.