Мелания Трамп Эпштейн ҳақида кескин баёнот берди
АҚШнинг биринчи хоними Мелания Трамп Оқ уйда қилган чиқишида молиячи ва жиноятчи сифатида танилган Жеффри Эпштейн билан боғлиқ ҳар қандай алоқани қатъий рад этди. Бу ҳақда The Washington Post хабар берди.
Мелания унга нисбатан билдирилаётган ноаниқ ва асосланмаган даъволарни “ёлғон” деб атаб, уларга зудлик билан чек қўйилиши кераклигини таъкидлади. У Эпштейннинг жабрдийдаларга нисбатан содир этган зўравонликларига ҳеч қандай шаклда алоқаси бўлмаганини қайд этди.
Шу билан бирга, у Эпштейн ва унинг яқин ҳамкори Гислейн Максвеллни фақат танишлар сифатида таърифлаб, улар 2000-йиллар бошида у ҳамда Дональд Трамп иштирок этган айрим тадбирларда тасодифан учрашиб қолганини айтди.
АҚШ президенти рафиқаси, унинг обрўсига путур етказишга қаратилган ҳаракатларни “манфаатли ва сиёсий мақсадларга йўғрилган туҳмат” деб атади ва бундай даъволар тўхтатилиши шартлигини билдирди.
Мелания Конгрессни Эпштейн жабрдийдалари бўйича тингловлар ўтказишга чақирди. Бироқ журналистлар саволларига жавоб беришдан бош тортди.
АҚШ президенти эса МS NOW телеканалига берган қисқа изоҳида, рафиқасининг баёнотидан аввал бу мавзу ҳақида хабардор бўлмаганини айтди. Шунингдек, у Мелания Эпштейнни шахсан танимаслигини қўшимча қилди.
Меланиянинг Эпштейн билан эҳтимолий алоқалари ҳақидаги муҳокамалар жорий йил бошидан бери қайта фаоллашган. Бунга 2002 йилда Максвеллга юборилган электрон хатнинг ошкор этилиши сабаб бўлган.
Ўша мактубда у Максвеллни “Г” деб атаб, Нью-Йоркка қайтгач, албатта боғланишни сўраган. Шунингдек, у журналда чиққан суратлар юзасидан ҳам ижобий фикр билдирган.
Мелания эса бу ёзишмаларни оддий, тасодифий хат алмашув сифатида баҳолаган ҳамда Эпштейн билан боғлиқ ҳеч қандай ноқонуний жойларда бўлмаганини таъкидлаган.
2019 йилда жиноий иш бўйича ҳибсда вафот этган Эпштейн билан боғлиқ ҳужжатлар кейинчалик оммага ошкор қилингач, бу мавзудаги баҳслар яна кучайган.
Сўнгги ойларда бошқа геосиёсий ва иқтисодий масалалар бу мавзудан диққатни бироз четлатган бўлса-да, Меланиянинг янги баёноти масалани яна кун тартибига олиб чиқиши мумкин.