Трамп Эрон билан Ҳормузни биргаликда назорат қилишни таклиф қилди
АҚШ президенти Трамп Ҳормуз бўғози хавфсизлигини таъминлаш мақсадида Эрон билан “қўшма лойиҳа” шаклида ҳамкорлик қилишни кўриб чиқишини маълум қилди. У, шунингдек, бўғоз орқали транзит шартлари ва юк ҳаракатини муҳокама қилиш имкониятлари борлигини ҳам айтди. Бу ҳақида ABC News хабар қилди.
Можародан олдин Ҳормуз бўғози халқаро денгиз ҳуқуқига кўра эркин ҳаракатланадиган сув йўли ҳисобланар эди. Bloomberg агентлиги маълумотларига кўра, Форс кўрфазида Эронга қарши ҳарбий ҳаракатлар туфайли 800 дан ортиқ кема бўғоздан ўта олмай тўпланиб қолган.
Агентлик ёзишича, “Икки ҳафталик келишув Ҳормузни вақтинча очиши мумкин, аммо вазият ҳануз хавфли, кема эгалари эса хавфсизлик кафолатисиз ҳаракатни тиклашга шошилмаяпти”.
Яқинда чиққан хабарларга кўра, Tasnim ахборот агентлиги маълум қилишича, агар Исроил Ливанга ҳужумларни давом эттирса, Эрон тузилган сулҳ келишувидан чиқиши мумкин. Ундан ташқари, Исроилнинг Ливанга қилган ҳужумларидан сўнг Эрон Ҳормуз бўғози орқали юк ташишни тўхтатгани ҳам хабар қилинган.