АҚШ ва Ўзбекистон ишбилармонлик ҳамкорлиги янги босқичга олиб чиқилади
Фото: t.me/SShMirziyoyeva
Вашингтонда Америкалик ва ўзбек ишбилармонлари орасидаги алоқаларни янада мустаҳкамлаш мақсадида Америка–Ўзбекистон ишбилармонлик ва инвестиция кенгашининг расман ишга тушириш маросими бўлиб ўтди. Ушбу тадбирда кенгаш ҳамраислари, Ўзбекистон Президенти администрацияси раҳбари Саида Мирзиёева ва АҚШ президентининг Жанубий ва Марказий Осиё бўйича махсус вакили Сержио Гор иштирок этди.
Маросимда иқтисодий ҳамкорликни янги босқичга кўтариш, сармоялар жалб қилиш ва икки мамлакат орасидаги бизнес алоқаларини мустаҳкамлаш каби муҳим масалалар муҳокама қилинди. Саида Мирзиёева ўзининг Telegram каналида "Бу тузилма Ўзбекистон ва АҚШ ўртасидаги бизнес алоқаларини янада мустаҳкамлашга хизмат қиладиган самарали майдонга айланиши шубҳасиз. Бу борада президентларимиз томонидан билдирилган қатъий сиёсий ирода мустаҳкам замин яратмоқда", деб ёзди.
Маросимдан олдин ўтказилган учрашувда, икки томоннинг амалий ҳамкорликнинг устувор йўналишларини муҳокама қилиш учун биргаликдаги режалар ҳақида келишиб олинди.
Тадбир Ўзбекистон ва АҚШ ўртасидаги стратегик ҳамкорликни янги йўналишларда ривожлантиришда муҳим қадам бўлиб хизмат қилмоқда.