Маҳачқалъада кучли ёмғирлардан сўнг турар жой биноси қулаб тушди
Доғистоннинг пойтахти Маҳачқалъа шаҳрида кучли ва тўсатдан юзага келган ёмғирлар оқибатида юзага келган сув тошқинлари бир қатор муаммоларни келтириб чиқарди. Айниқса, уч қаватли турар жой биносининг пойдевори ювилиб кетди ва бино қулаб тушиши орқали аҳолида катта хавотир уйғотди.
Шаҳар маъмурияти маълум қилишича, Айвазовский кўчасидаги “қулаш хавфи сақланаётган” тўртта кўп қаватли уй атрофига хавфсизлик чоралари кўрилган ва улар қуршаб олинган. Ушбу биноларда яшовчи 300дан ортиқ аҳоли фавқулодда ҳолатлар туфайли хавфсиз жойларга эвакуация қилинди.
“Аҳолининг бир қисми вақтинчалик жойлаштириш пунктларига олиб кетилади, уларга зарур ёрдам ва кўмак кўрсатилади. Қолганлар эса қариндошлари уйларига вақтинча жойлаштирилмоқда,” – деди шаҳар матбуот хизмати.
“Интерфакс” агентлигига кўра, Айвазовский кўчасидаги турар жой биноларидан бирига туташтириб қурилган қўшимча бино ҳам ёмғир оқибатида қулаган. Аммо ҳеч ким жабрланмаган. Ҳозирда бир неча кўп қаватли уй аҳолиси сув босиш хавфи туфайли эвакуация қилинмоқда.
Шимолий Кавказда март ойи охиридан бери катта ёмғирлар ва сув тошқинлари кузатилмоқда. Энг кўп зарар Доғистонда рўй берган: ўн минглаб аҳоли электр таъминотисиз қолган, автомобил йўллари ҳаракат учун ёпиқ, темир йўллар шикастланган. Маҳачқалъада кўплаб кўчалар сув билан тўлиб, транспорт ҳаракати тўхтатилган. Шу билан бирга, Чеченистонда ҳам қатор кучли ёмғирлар ва ер кўчкилари 17та кўприкқа зарар етказган, ўнлаб уйлар вайрон бўлган.
Ҳозирда шаҳар маъмурияти ва қутқарув хизматлари сув босиш ҳудудларида аҳолининг хавфсизлигини таъминлаш ва зарарни минималлаштириш учун доимий назорат олиб бормоқда.