Наманганда ноқонуний БАДлар аниқланди, катта схема фош этилди

Давлат хавфсизлик хизмати ходимлари томонидан Ички ишлар ва Божхона органлари билан ҳамкорликда ўтказилган тезкор тадбир давомида яна бир жиддий қонунбузарлик ҳолати фош этилди. Бу гал гап қўшни давлатдан яширин йўллар орқали олиб кирилган биологик фаол қўшимчалар ҳақида бормоқда.

Маълумотларга кўра, тадбир Наманган шаҳри ҳудудида амалга оширилган бўлиб, унда 1977 йилда туғилган маҳаллий фуқаро бошқараётган «Дамас» русумли автомашина текширувдан ўтказилган. Автомашина салони кўздан кечирилганда, хорижда ишлаб чиқарилган, аммо мамлакатга киритиш учун зарур бўлган ҳужжатлар билан таъминланмаган бир неча турдаги маҳсулотлар аниқланган.

Текширув жараёнида жами 5 турдаги биологик фаол қўшимчалар борлиги маълум бўлди. Бу маҳсулотлар қонун талабларига зид равишда расмийлаштирилмасдан олиб кирилган бўлиб, уларнинг келиб чиқиши ва мақсади шубҳаларни кучайтирган.

Терговга қадар ўтказилган суриштирувларда ушбу фуқаро ва унинг турмуш ўртоғи томонидан берилган кўрсатмалар орқали бутун занжир очила бошлади. Аниқланишича, мазкур маҳсулотлар қўшни давлатдан айланма ва ноқонуний йўллар орқали мамлакат ҳудудига киритилган. Режага кўра, улар Андижон вилояти ҳудудида бошқа шахсга топширилиши керак бўлган.

Шу асосда тезкор тадбирлар давом эттирилиб, Андижон вилоятининг Олтинкўл туманида навбатдаги босқич амалга оширилди. У ерда мазкур биологик қўшимчаларни қабул қилиб олаётган вақтида уларнинг ҳақиқий эгаси сифатида гумон қилинган шахслар ушланди. Улардан бири Қирғиз Республикасининг Жалол-Обод вилояти Манас шаҳрида яшовчи, 1976 йилда туғилган аёл бўлса, иккинчиси Қўрғонтепа туманида истиқомат қилувчи, 1982 йилда туғилган шахс экани маълум қилинди.

Тергов маълумотларига кўра, қўлга киритилган маҳсулотлар орасида «Самюн Ван», «Черный тмин», «Сенна Мекканская», «Мумие Алтайское» ва «Кыст аль-Хинди» каби турли номлардаги биологик фаол қўшимчалар мавжуд бўлган. Уларнинг умумий сони 2957 дона флаконни ташкил этиб, тахминий қиймати 226 миллион 343 минг сўмга баҳоланган.

Мутахассислар таъкидлашича, бундай маҳсулотларнинг ноқонуний равишда олиб кирилиши нафақат иқтисодий зарар, балки аҳоли саломатлиги учун ҳам жиддий хавф туғдириши мумкин. Чунки уларнинг сифати, таркиби ва хавфсизлиги расмий текширувдан ўтмаган бўлади.

Ҳозирги вақтда ушбу ҳолат юзасидан жиноят иши қўзғатилиб, барча иштирокчиларнинг ҳаракатларига ҳуқуқий баҳо бериш бўйича тергов ишлари олиб борилмоқда. Қонунни четлаб ўтишга уринишлар қанчалик “айёр” бўлмасин, барибир бир кун фош бўлиши аниқ — тизим ҳозир анча қаттиқ ишлаяпти.